Dövlət Dəniz Akademiyasında ümummilli lider Heydər Əliyevin anım gününə həsr olunmuş tədbir keçirilib
Bakı, 10 dekabr, Ceyhun Rüstəmov, AZƏRTAC
Dekabrın 10-da “Azərbaycan Xəzər Dəniz Gəmiçiliyi” QSC-nin Dövlət Dəniz Akademiyasında ümummilli lider Heydər Əliyevin vəfatının 11-ci ildönümü ilə əlaqədar anım gününə həsr olunmuş tədbir keçirilib.
AZƏRTAC xəbər verir ki, əvvəlcə Ulu Öndərin xatirəsi birdəqiqəlik sükutla yad edilib.
QSC-nin sədri Rauf Vəliyev “Heydər Əliyev müasir Azərbaycan dövlətinin qurucusudur” adlı məruzəsində Ulu Öndərin istər keçmiş SSRİ zamanında, istərsə də müstəqilliyimizi bərpa etdikdən sonra respublikamıza rəhbərlik etdiyi illəri Azərbaycanın əsl inkişaf dövrü adlandırıb. R.Vəliyev, həmin illərdə ölkə iqtisadiyyatının, elminin, mədəniyyətinin, ümumiyyətlə dövlətçiliyinin çox böyük uğurlar qazandığını vurğulayıb. Qeyd edib ki, ürəyi Vətən məhəbbəti, xalq sevgisi ilə döyünən bu böyük dövlət xadiminin hələ 70-80-ci illərdə respublikamızda sənayenin yeni sahələrinin yaradılmasında, fiziki və mənəvi cəhətdən köhnəlmiş müəssisələrin müasirləşdirilməsində, yeni yaşayış massivlərinin salınmasında misilsiz xidmətləri olub.
“Ölkəmizin əldə etdiyi nailiyyətlər, inkişaf və tərəqqi, xalqımızın milli mənliyinin yüksəlişi Heydər Əliyevin adı ilə bağlıdır”, - deyən QSC sədri bildirib ki, biz bu gün Ulu Öndəri müstəqil dövlətçiliyimizin memarı və qurucusu, xalqımızın xilaskarı adlandırarkən təkcə 1993-2003-cü illərdə gördüyü nəhəng işləri deyil, həm də 1969-1982-ci illərdəki misilsiz xidmətlərini də minnətdarlıq hissi ilə xatırlayırıq.
Qeyd olunub ki, ümummilli lider Heydər Əliyevin 1969-cu ildə respublikamıza rəhbər təyin edilməsi ilə Azərbaycan iqtisadiyyatının bir çox sahələri kimi, neft sənayesində də yeni inkişaf dövrü başlamışdı. Həmin dövrdə neft-qaz ehtiyatlarının çox hissəsinin yerləşdiyi dəniz yataqlarının kəşf edilib istismara verilməsi xeyli sürətləndirilmişdi. Dənizdə bir-birinin ardınca çoxsaylı neft-qaz yataqlarının, o cümlədən zəngin “Günəşli” yatağının kəşfi məhz Ulu Öndərin respublikamıza rəhbərlik dövrünə təsadüf edir. Dənizdəki neft-qaz yataqlarının genişmiqyaslı işlənməyə cəlb edilməsi Xəzər Dəniz Neft Donanmasının (XDND) da imkanlarını xeyli artırıb.
QSC sədri diqqətə çatdırıb ki, müstəqillik dövründə Heydər Əliyevin rəhbərliyi ilə işlənib hazırlanmış yeni neft strategiyasının təməlini təşkil edən “Əsrin müqaviləsi” XDND-nin qarşısında yeni üfüqlər açıb. “Azəri”, “Çıraq” yataqlarında və “Günəşli” yatağının dərinlikdə yerləşən hissəsində tikinti-quraşdırma və mənimsəmə işlərinin aparılması məhz XDND-nin gəmiləri vasitəsilə həyata keçirilib.
Ulu Öndərin Gəmiçiliyə göstərdiyi diqqət və qayğıdan da bəhs edən R.Vəliyev, bu böyük şəxsiyyətin donanmanın müasirləşdirilməsindəki xidmətləri barədə ətraflı məlumat verib. Bildirib ki, vaxtilə keçmiş SSRİ-də mövcud olan 16 gəmiçilikdən öz donanmasını qoruyub saxlayan yalnız Xəzər Dəniz Gəmiçiliyidir. Bu da məhz Heydər Əliyevin diqqəti sayəsində mümkün olub.
“Biz sağlığında əfsanələşən Heydər Əliyevin böyüklüyünü zaman keçdikcə daha çox hiss edəcəyik”, - deyən QSC sədri diqqətə çatdırıb ki, indi xalqımız gələcəyə böyük nikbinliklə baxır və öz taleyini Ulu Öndərin milli dövlətçilik ideyalarının sadiq davamçısı İlham Əliyevə etibar edib. Prezident İlham Əliyevin fəaliyyəti göstərir ki, Heydər Əliyev ideyaları yaşayır, onun siyasəti davam edir, xalqımız öz firavan gələcəyinə doğru inamla addımlayır.
Sonda ümummilli lider Heydər Əliyevin zəngin həyat və fəaliyyətinə həsr edilmiş sənədli film nümayiş olunub.
Bölmənin digər xəbərləri
