DÖVLƏT GÖMRÜK KOMİTƏSİ MƏTBUAT XİDMƏTİNİN MƏLUMATI
Hava Nəqliyyatında Baş Gömrük İdarəsinin əməkdaşları tərəfindən 005 nömrəli Bakı-Tehran aviareysı ilə uçmaq istəyən İran vətəndaşları Məhəmməd Rza Fərəhmənd Mustafa oğlu və Məneje Əmirarslani Həsən qızından şəxsi yoxlama zamanı bəyan olunmamış, ölkə ərazisindən gizli çıxarmağa cəhd etdikləri 28 min 750 ABŞ dolları, 872 nömrəli Bakı-Moskva aviareysi ilə Rusiya vətəndaşı Nəsirov Həmid İsa oğlundan isə 24 min 100 ABŞ dolları aşkar olunaraq götürülmüşdür.
016 nömrəli Dubay-Bakı aviareysinin sərnişini, Azərbaycan vətəndaşı Ağayev Rəşad Canbaxış oğlunun əşyalarına gömrük baxışı zamanı, bəyan etmədiyi 231 ədəd müxtəlif markalı mobil telefon, 027 nömrəli Bakı-Hələb aviareysinin sərnişini, Küveyt vətəndaşı Məhəmməd Almarridən isə ona məxsus yükün içərisində 2 şahin quşu aşkar olunmuşdur.
X X X
Zaqatala rayonu Muğanlı kəndinin Gürcüstanla həmsərhəd ərazisində - Bulaqbaşı adlanan sahədə Balakən gömrükçülərinin Zaqatala rayon polis şöbəsinin əməkdaşları ilə birgə keçirdikləri əməliyyat tədbirləri nəticəsində 2,5 hektar sahədə 13 min 500 kiloqram yabanı halda bitmiş çətənə kolu toplanaraq məhv edilmişdir.
Balakən gömrükçülərinin rayon vergilər idarəsinin əməkdaşları ilə birgə keçirdikləri digər əməliyyat nəticəsində isə həmin rayonun “Gürcü bazarı” deyilən ərazisində Gürcüstan vətəndaşlarından 50 litr spirt və kustar üsulla hazırlanmış 70 litr araq aşkar edilərək götürülmüşdür.
X X X
Tovuz gömrükxanasının əməkdaşları “Sınıq körpü” məntəqəsində Azərbaycana gələn, Gürcüstan vətəndaşı Bayram Bayaz Yunis oğlunun idarə etdiyi “İkarus-250” markalı AAU 228 nömrəli sərnişin avtobusuna gömrük nəzarəti keçirərkən bəyan olunmamış 156 litr spirt tutmuşlar.
“Sınıq körpü” məntəqəsində Gürcüstana gedən, Azərbaycan vətəndaşı İsmayılov Bəkır Mürşüd oğlunun idarə etdiyi “KUBAN-01 Kİ-02” markalı 20 AD 090 dövlət nömrə nişanlı avtobusa gömrük nəzarəti keçirilərkən 6 min 200 kiloqram bəyan olunmamış mis aşkar edilmişdir.
X X X
Azərbaycan vətəndaşı Hüseynov Rauf Şəmistan oğlunun idarə etdiyi “İKARUS 250” markalı 10 GU 904 dövlət nişanlı avtobus İrandan gələrkən Astara gömrükxanasının əməkdaşları tərəfindən yoxlanılmış, oradan 7 min 700 qutu “PLEASURE” siqareti, İrana gedən, Azərbaycan vətəndaşı Məmmədov Səyavuş Ramiz oğlunun idarə etdiyi “Kamaz” markalı AZ 42-AC-208 dövlət nömrə inşanlı yük maşınından isə 115 qramlıq bankalarda 8 kiloqram 165 qram kürü, 1040 qutu plastik oyun kartları və xeyli miqdarda şirniyyat aşkar edilmişdir.
Bütün faktlar üzrə təhqiqat aparılır.
X X X
Sentyabrın 17-də gömrük orqanlarının əməkdaşları Sumqayıt yaxınlığında, xüsusi ayrılmış ərazidə 23 min 251 qutu saxta “Ariel” yuyucu tozunu yandırmaqla məhv etmişlər.
Xatırladaq ki, Balakən gömrükxanasının Mazımçay gömrük postunda Gürcüstan ərazisindən Azərbaycana keçirilməsinə cəhd göstərilən “Ariel” əmtəə nişanlı bu qədər yuyucu toz gömrükçülər tərəfindən aşkar olunmuş, “Azərterminalkompleks” təsərrüfat hesablı xarici-iqtisadi birliyinin anbarına yerləşdirilmişdi. Dövlət Gömrük Komitəsinin istintaq idarəsi tərəfindən ibtidai istintaqı başa çatdırılan iş baxılmaq üçün Balakən rayon məhkəməsinə göndərilmiş və həmin məhkəmə tərəfindən müvafiq hökm çıxarılmışdır.
“Ariel” əmtəə nişanlı yuyucu tozun mənşəyi və kimyəvi tərkibini müəyyən etmək məqsədi ilə “Azərterminalkompleks” birliyi tərəfindən bu məhsulun istehsalçısı “Prokter & Gamble” şirkətinə müraciət olunmuşdur. Həmin şirkətin əmtəəşünaslıq ekspertizasına dair aktında “Ariel” tozunun standarta uyğun gəlməməsi barədə rəy verilmişdir. Dövlət Gömrük Komitəsinin mərkəzi laboratoriyasının yuyucu tozun mənşəyi və kimyəvi tərkibi barədə verdiyi rəydə “Əmtəə nişanları və çoğrafi göstəricilər haqqında” Azərbaycan Respublikası Qanununun tələblərinin pozulması göstərilmişdir. Ədliyyə Nazirliyinin Elmi Tədqiqat Məhkəmə Ekspertizası, Kriminalistika və Kriminologiya Problemləri İnstitutunun verilən rəydə də bu məhsulun kontrafakt olduğu, onun respublika ərazisində satışına qadağa qoyulması və məhv edilməsi məqsədəuyğun hesab olunmuşdur.
Bölmənin digər xəbərləri
