DÖVLƏT GÖMRÜK KOMİTƏSİNDƏ GÖRÜŞ
DGK-nın mətbuat xidmətindən AZƏRTAC-a verilən məlumata görə, Komitənin sədri Aydın Əliyev avqustun 31-də ölkəmizdə gömrük xidmətinin təkmilləşdirilməsi layihəsi üzrə Bakıya dəvət olunmuş beynəlxalq ekspert Antoni G.Mort ilə görüşmüşdür.
Komitə sədri gələn il 15 yaşı olacaq müstəqil Azərbaycanın gömrük xidmətinin inkişaf yolundan, ümummilli lider Heydər Əliyevin diqqət və qayğısı nəticəsində əldə olunmuş uğurlardan danışmışdır. Qazanılan nailiyyətlərin davamlı olması üçün bu sahədə qanunvericilik bazasının beynəlxalq standartlara uyğun şəkildə təkmilləşdirilməsinin əhəmiyyətini vurğulayan Aydın Əliyev BMT-nin İnkişaf Proqramı və Avropa İttifaqı ilə birgə həyata keçirilən layihənin bu baxımdan əhəmiyyətli olacağına əminliyini söyləmişdir.
Antoni G.Mort demişdir ki, Azərbaycan gənc dövlət olsa da, burada gömrük sisteminin tarixi keçmişə gedib çıxır. Bu isə onu deməyə əsas verir ki, Azərbaycanda bu sahədə zəngin təcrübə vardır. Qonaq Gömrük Məcəlləsinin yeni variantının işlənib hazırlanmasına həqiqətən də zərurət yarandığını vurğulamış, artıq bu istiqamətdə işlərin xeyli hissəsinin görülməsini, DGK-da yaradılmış yerli mütəxəssislərdən ibarət işçi qrupunun peşəkarlığını yüksək qiymətləndirmişdir.
Beynəlxalq ekspert yeni Gömrük Məcəlləsinin beynəlxalq standartlara cavab verəcək bir səviyyədə olacağına əminliyini söyləmişdir.
Bölmənin digər xəbərləri
