Dövlət Yanğından Mühafizə Xidmətinin rəisi: Bu il 5700 yanğın hadisəsi qeydə alınıb
Ağdam, 26 iyun, Tahir Ağaməmmədov, AZƏRTAC
Havaların isti keçməsi ilə əlaqədar olaraq son günlər respublikada yanğınların sayı kəskin sürətlə artıb. Ötən il gün ərzində orta hesabla 40 yanğın xəbəri alırdıqsa, indi sutka ərzində 150, bəzən də 160 yanğın qeydə alınır.
AZƏRTAC-ın bölgə müxbiri xəbər verir ki, bunu jurnalistlərə açıqlamasında Fövqəladə Hallar Nazirliyinin Dövlət Yanğından Mühafizə Xidmətinin rəisi, daxili xidmət general-mayoru Füzuli Əsədov bildirib.
O qeyd edib ki, bütün yanğın hadisələri FHN-in nəzarətindədir: “FHN-in aidiyyəti qurumları tərəfindən zəruri tədbirlər görülür. Cari ilin ötən dövrü ərzində 5700 yanğın hadisəsi qeydə alınıb. Bu yanğınların çoxu açıq sahələrdə baş verən yanğınlardır. Biçilmiş taxıl və otlaq sahələrində yanğınların baş verməsinə əsas səbəb yanğın təhlükəsizliyi qaydalarının pozulmasıdır. Bəzən də qəsdən yandırma halı da müşahidə olunur. Hər il baş verən bu yanğınların 60-65 faizi açıq sahədə baş verən yanğınlardır. Bunun qarşısının alınması üçün nazirlik tərəfindən tədbirlər görülür. Müqayisə üçün deyim ki, 2019-cu ildə 12 min 200 hektar biçilmiş taxıl sahəsi yanmışdırsa, 2020-ci ildə bu, altı dəfə azalaraq 2300 hektara düşüb. Bu il isə həmin rəqəm 200 hektardan bir az artıqdır. Yanğınlarda insan tələfatına gəldikdə, bu sahədə də irəliləyiş əldə olunub. Ötən il yanğın yerində həlak olanların sayı 33 nəfər təşkil edib ki, bu da nazirlik yaranandan ən aşağı göstəricidir. Bu ilin ötən dövründə isə 16 ölüm faktı qeydə alınıb".
Füzuli Əsədov bildirib ki, işğaldan azad olunmuş rayonlarda yanğından mühafizə xidməti təşkil edilib. Həmin rayonlarda sutkalıq rejimdə yanğından mühafizə xidməti və xilasedicilərin şəxsi heyəti yanğın texnikası ilə birlikdə növbə çəkir. Artıq bu rayonlarda 180-dən artıq yanğın hadisəsi qeydə alınıb. Görülən tədbirlər nəticəsində bu yanğınların qarşısı vaxtında alınıb.
Bölmənin digər xəbərləri
