DUBAY HƏBSXANALARINDA CƏMİ 8 NƏFƏR AZƏRBAYCANLI CƏZA ÇƏKİR
Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a bildirmişlər ki, komitənin əməkdaşları Günel Heydərova və Qalib Kərimov bu günlərdə Birləşmiş Ərəb Əmirliklərində işgüzar səfərdə olmuşlar. Onlar bu ölkədə yaşayan azərbaycanlıların vəziyyəti ilə maraqlanmış, bir sıra görüşlər keçirmişlər.
Azərbaycanın BƏƏ-ki səfiri Eldar Səlimov Dövlət Komitəsinin xahişinə əsasən bu ölkənin rəsmi orqanlarına sorğu ilə müraciət etmişdir. Sorğuya verilən cavabda deyilir ki, Dubay həbsxanalarında cəmi 8 nəfər azərbaycanlı var ki, onların da hamısı kişilərdir. Cəza çəkənlərin 2-si narkomanlıqda, 6-sı isə quldurluqda günahkar biliniblər. Səfirin bildirdiyinə görə, əxlaqsızlıqla məşğul olanlar tutulan kimi dərhal ölkədən deportasiya edilirlər. BƏƏ hökuməti ölkəyə daxil olan 30 yaşına qədər qadınların viza almalarını çətinləşdirib. Lakin bu haqda yazılı bir qanun mövcud deyildir.
Bölmənin digər xəbərləri
