Düşmən əsgərləri qaçırlar, biz onları qovuruq...
Şəhid Əli Nağıyevin anası: Dedi ki, lap az qalıb, yaxın vaxtlarda Ucara elçiliyə gedəcəksən
Bakı, 21 oktyabr, AZƏRTAC
Vətən müharibəsinin qızğın çağları olsa da, Əli imkan tapan kimi evə zəng edir, anası ilə danışır, onu narahatlıqdan xilas etməyə çalışırdı: “Burada hər şey yaxşıdır, düşmən əsgərləri qaçırlar, biz isə onları qovuruq... Məndən nigaran olmayın!"
Anası Lalə xanım onun telefon zənglərini və onunla danışdıqlarını da yaxşı xatırlayır: "Ana, heç nəyin fikrini çəkmə! Döyüş əməliyyatları tezliklə Ordumuzun qələbəsi ilə bitər və xoş müjdə ilə geri qayıdaram. Yenə maaşımı alanda səninlə birlikdə dükan-bazara gedib, alış-veriş edərik. Lap az qalıb, yaxın vaxtlarda Ucara elçiliyə gedəcəksən".
Əlinin bu cür danışması səbəbsiz deyildi, ailə toya hazırlaşırdı. Artıq onun 29 yaşı var idi. O, evlənmək, subaylığın daşını atmaq, ata-anasına gəlin gətirmək istəyirdi...
2020-ci il sentyabrın 27-də başlanan döyüş əməliyyatları isə Əlinin arzularını ürəyində qoydu...
AZƏRTAC xəbər verir ki, Əli Mehman oğlu Nağıyev 1991-ci il dekabrın 25-də Bakı şəhərində anadan olub. O, 2020-ci il sentyabrın 21-də yaşadığı Səbail rayonundan hərbi xidmətə çağırılıb. Sentyabrın 27-dən Ermənistanın təxribatına cavab olaraq başlanan döyüş əməliyyatlarında iştirak edib. Vətən müharibəsinin ilk günündən erməni silahlı birləşmələrinin təxribatlarına cavab olaraq Füzuli rayonunun kəndlərinin azad olunması uğrunda Azərbaycan Milli Ordusunun Zəfər yürüşünə qoşulub. Sonralar onun cəbhə yolu Cəbrayıldan, Hadrutdan və Xocavənddən keçib.
Cəbhənin ən qaynar nöqtələrindən olan Xocavənd rayonunda hər gün yeni-yeni yaşayış məntəqələri düşmən tapdağından təmizlənirdi. Azərbaycan əsgərlərinin zərbələri nəticəsində geri çəkilən düşmən qüvvələri itirdikləri mövqeləri yenidən ələ keçirmək üçün hiyləyə əl atsalar da, sərt müqavimətlə rastlaşır, qaçmağa məcbur olurdular. Əli döyüşçü dostları ilə birlikdə şücaətlə vuruşur, qumbaraatanla düşmənin hədəflərinə sərrast atəş açırdı.
Lakin həmin döyüşlərdən biri onun üçün sonuncu oldu. Oktyabrın 20-də o, hərbçi yoldaşları ilə birlikdə Xocavənddə pusquya düşüb. Onlar çox böyük əzmkarlıq göstərərək pusqudan çıxa bilsələr də, ermənilərin mərmi yağışına tuş gəliblər. Əlinin yaxınlığına düşən minaatan mərmilərindən biri igid əsgəri ölümcül yaralayıb. Xocavənd bölgəsi uğrunda gedən həmin qızğın döyüşdə o, şəhidlik zirvəsinə ucalıb.
İki gün sonra onun nəşini böyüdüyü ata ocağına gətiriblər. Əli ilə vidalaşmağa çox böyük izdiham toplaşmışdı. Dostları, məktəb və iş yoldaşları, tanışları, şücaəti haqqında eşidənlər, hətta onu tanımayanlar doğulduğu evin həyətindən Əlinin tabutunu çiyinlərinə götürüb, torpağa tapşırdılar...
...Badamdardakı Səbail rayon şəhidlərinin uyuduğu qəbiristanlıqda Vətən müharibəsinin 11 şəhidi uyuyur. Onlardan biri də Əli Nağıyevdir. Bura təkcə şəhid ailələri üçün yox, həm də şəhidləri tanıyan və tanımayan hər kəs üçün müqəddəs ziyarətə çevrilib. Əlinin məktəbli dostları, müəllimləri, döyüş yoldaşları, müharibədən əvvəl birgə çalışdığı əmək kollektivlərinin nümayəndələri tez-tez buraya ziyarətə gəlir, torpaqlarımızın azadlığı uğrunda şəhid olan igid döyüşçünün xatirəsinə dərin hörmət və ehtiramlarını ifadə edirlər.
Əli Nağıyev "Vətən uğrunda", "Füzulinin azad olunmasına görə" və "Xocavəndin azad olunmasına görə" medallarına layiq görülüb.
Bölmənin digər xəbərləri
