Edinburqda alimlər 3D printerdən çıxan kimi yeriyə bilən yumşaq robotlar hazırlayıblar
London, 26 may, AZƏRTAC
Şotlandiyanın Edinburq Universitetinin alimləri yumşaq robot texnologiyasında əhəmiyyətli irəliləyiş əldə ediblər.
AZƏRTAC “Independent”ə istinadla xəbər verir ki, onlar 3D printerdən çıxan kimi yeriməyə başlayan dördayaqlı robotlar hazırlayıblar. Yeni texnologiya robotların tərsinə çap üsulu (upside-down printing method) ilə hazırlanmasına əsaslanır. Bu metod sayəsində yumşaq plastik kimi elastik materiallardan ibarət robotların istehsalı həm sadələşir, həm də geniş miqyasda mümkün olur.
Yumşaq robotlar nüvə obyektlərinin sökülməsi, biotibbi tətbiqlər və kosmos araşdırmaları kimi sahələrdə böyük potensiala malikdir. Lakin bu sahədə dizaynın standartlaşdırılmaması və istehsalın yüksək xərc tələb etməsi indiyədək geniş istifadəyə mane olub. Edinburq Universitetinin komandası bu problemləri həll etmək məqsədilə sadə və sərfəli stolüstü 3D çap sistemi hazırlayıb. Bu qurğu bazarda asanlıqla tapılan hissələrdən cəmi 400 funt sterlinqdən aşağı bir xərcə yığıla bilir və istifadəçiyə yumşaq robotları rahatlıqla çap etməyə imkan verir.
Yeni texnologiyanın yumşaq robotların daha geniş tətbiq sahələrinə yol açacağı gözlənilir.
Ənənəvi 3D çapdan fərqli olaraq tərsinə çap üsulu obyektin yuxarıdan aşağıya doğru çap edildiyi texnologiyadır.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
