EFİR MƏKANININ TƏMİZLƏNMƏSİ ÜÇÜN PLAN HAZIRLANMIŞDIR
Rabitə və informasiya texnologiyaları naziri Əli Abbasov AZƏRTAC-ın müxbirinə demişdir ki, ölkə ərazisində efir məkanının təmizlənməsi və normal vəziyyətə gətirilməsi məqsədilə tədbirlər planı artıq hazırdır. Həmin plan bütün teleradio şirkətlərinə göndəriləcəkdir. Bu qurumlar göstərilən tələblərə əməl etsələr, yaxın vaxtlarda problem həllini tapacaqdır. Ölkənin sərhəd bölgələrindəki kiçik dairələrdə kanalların bölüşdürülməsi bütün sərhəd ölkələri ilə razılaşdırılıb. Artıq İranla da bu barədə şifahi razılaşma əldə olunub.
Nazir vurğulamışdır ki, bu gün Azərbaycanda quraşdırılmış teleqüllələr efir məkanının təmizliyinin qorunması və normal yayımın təmin olunması üçün kifayətdir. Hazırda həmin qüllələrin texniki parametrləri qaydaya salınır. Bəzi ərazilərdə əlavə stansiyaların quraşdırılması nəzərdə tutulmuşdur.
Bölmənin digər xəbərləri
