ƏFQANISTANDA İRAN MİFOLOGİYASI PERSONAJLARININ TƏSVİR OLUNDUĞU FRESKALAR TAPILMIŞDIR

28.07.2006 [10:33]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Yaponiya tədqiqatçıları Əfqanıstanın mərkəzində qədim Budda asari-ətiqələrinin yerləşdiyi Bamiyan şəhərində İran mifologiyası personajlarının təsvir olunduğu freskalar tapmışlar. Mağarada aşkar olunan tapıntılar eramızın VII əsrinə aiddir. Alimlər qədim rəssamın nə təsvir etmək istədiyini hələlik birmənalı şəkildə deyə bilmirlər. Freskadakı təsvir İran misteriyalarının qoruyucusu Simorqu xatırladır. Bu, İran əfsanələrində peyğəmbərlik qabiliyyətinə malik bir növ yarısimurq quşu, yarışir formasında nəhəng qrifondur. O, qartal başlı, şir bədənli, qanadlı mifik Qrifona da bənzəyir.

Buruqvarı Şərq ornamenti ilə işlənmiş rəsmlər buddizm texnikasında icra edilmişdir. Belə şəkilçəkmə texnikası eramızın I-VI əsrlərində Pakistanın şimal-qərbindəki Qəndar vilayətində və Əfqanıstanın şərqində geniş yayılmışdı.

Yaponiya Mədəni Sərvətlər Milli Elmi Tədqiqat İnstitutunun alimləri və arxeoloqları BMT-nin Təhsil, Elm və Mədəniyyət Məsələləri Təşkilatının (YUNESKO) məşhur İpək Yolunun əsas mərkəzlərindən biri Bamiyanın tarixi və mədəni abidələrinin mühafizəsi layihəsində fəal iştirak edirlər.

Mağarada Buddanın 2,5 metr hündürlüyündə pəncəsinin bir hissəsi və bir sıra nadir mağara freskaları da tapılmışdır.