Eka Sepaşvili: Salome Zurabişviliyə xaricdən növbədənkənar seçkilər təyin etmək göstərişi verilib
Tbilisi, 23 dekabr, AZƏRTAC
Salome Zurabişviliyə xaricdən növbədənkənar seçkilər təyin etmək göstərişi verilib, amma onun bu cəhdi baş tutmayacaq.
AZƏRTAC xəbər verir ki, bu barədə Gürcüstan parlamentində “Xalqın Gücü” Partiyasının deputatı Eka Sepaşvili deyib.
Deputat Salome Zurabişvilinin Gürcüstanda dekabrın 29-dək növbədənkənar seçkilərin təyin edilməsi ilə bağlı bəyanatını tənqid edib. Bildirib ki, Zurabişvili real deyil, paralel bir dünyada yaşayır.
“Görünür o, xaricdən ciddi göstəriş alıb ki, növbədənkənar seçkilər təyin etsin və bu istiqamətdə çalışır. Lakin onun bu cəhdi baş tutmayacaq. Təəssüf ki, Gürcüstan tarixində ilk dəfədir ki, Konstitusiyanı pozan, qanunlara tabe olmayan və xalqın iradəsini nəzərə almayan belə bir prezidentimiz var. O, xarici aktorların tapşırıqlarını öz ölkəsinin maraqlarından üstün tutur”, – deyə Sepaşvili vurğulayıb.
Onun sözlərinə görə, Zurabişvilinin bəyanatlarını kimsə ciddi qəbul etmir. Onun açıqlamaları heç bir hüquqi və siyasi reallığa əsaslanmır. O, konstitusiyanı bir kənara ataraq, öz şəxsi maraqlarını üstün tutur.
Qeyd edək ki, prezidenti Salome Zurabişvili dekabrın 22-də Rustaveli prospektində keçirilən aksiyada çıxış edərək dekabrın 29-dək növbədənkənar parlament seçkilərinin keçirilməli olduğunu bildirib.
AZƏRTAC-ın xüsusi müxbiri
Tbilisi
Bölmənin digər xəbərləri
