Ekoloji qanunvericiliyin tələblərinə riayət etməyənlər cərimələnmişlər
Bakı, 22 oktyabr (AZƏRTAC). Ekologiya və Təbii Sərvətlər Nazirliyinin Ətraf Mühitin Mühafizəsi Departamentinin əməkdaşları tərəfindən oktyabrın 1-dən 15-dək ölkə ərazisində ekoloji qanunvericiliyin tələblərinə riayət olunmasını yoxlamaq məqsədi ilə aparılmış araşdırmanın nəticələri açıqlanmışdır.
Nazirliyin mətbuat xidmətindən AZƏRTAC-a bildirmişlər ki, araşdırma zamanı hüquqi və fiziki şəxslər tərəfindən su və torpaq ehtiyatlarının, atmosfer havasının, yerin təkinin, fauna və floranın mühafizəsi, o cümlədən ətraf mühitə qanunsuz məişət və istehsalat tullantılarının yerləşdirilməsi sahəsində qanun pozuntuları aşkar edilmişdir. Yol verilmiş qanun pozuntularına görə 119 akt və protokol tərtib olunmuş, nöqsanların aradan qaldırılması üçün 49 müddətli məcburi göstəriş verilmişdir.
Ümumilikdə 96 min 330 manat məbləğində cərimə tətbiq edilmiş, ətraf mühitə dəymiş ziyana görə 1744.92 manat məbləğində iddia qaldırılmış, ətraf mühitə tullantıların atılmasına və axıdılmasına görə hüquqi və fiziki şəxslərə 19 min 138.46 manat məbləğində ödəmə tətbiq edilmişdir.
Tədbir görülməsi üçün hüquq-mühafizə orqanlarına 6, icra qurumlarına isə 21 iş göndərilmişdir.
Bölmənin digər xəbərləri
