Ekspert: Azərbaycan ilə Almaniya arasındakı münasibətlərin yeni mərhələsinin uğurlu olacağı şübhə doğurmur
Bakı, 23 iyul, AZƏRTAC
Azərbaycan Prezidenti İlham Əliyevin Almaniyaya rəsmi səfəri zamanı “Azərbaycan-Almaniya Biznes Şurasının yaradılmasına və fəaliyyətinə dair Birgə Bəyannamə”nin imzalanması iki dövlət arasında qarşılıqlı faydalı əməkdaşlıq əlaqələrinin genişlənməsi ilə yanaşı, ölkəmizin Avropa bazarlarına yeni yollar açması kimi də qiymətləndirilməlidir. Azərbaycan qeyri-neft sektorunun inkişafı istiqamətində uğurla islahatlar həyata keçirib. Bu islahatlar arasında enerji sahəsində həyata keçirilən tədbirlər Almaniya üçün xüsusilə maraqlıdır.
Bu sözləri AZƏRTAC-a açıqlamasında iqtisad üzrə fəlsəfə doktoru Mehriban İmanova deyib.
O bildirib ki, Azərbaycanın coğrafi mövqeyi ona Avropa bazarlarına məhsul ixrac etməklə yanaşı, tranzit imkanları da yaradır. Almaniyanın Azərbaycan ilə iqtisadi əlaqələri genişləndirmək və birgə qurumlar yaratmaq istəyi təsadüfən meydana çıxmayıb. Azərbaycan karbohidrogen ehtiyatları ilə yanaşı, böyük alternativ enerji potensialına da malikdir. Bu gün Avropa, o cümlədən də Almaniya enerji böhranı yaşayır. Ukrayna-Rusiya və ABŞ-İran müharibələri Avropanın enerji təchizatında böyük problemlər yaradıb. Azərbaycan Avropaya neft və təbii qaz göndərməklə yanaşı, istehsal etdiyi alternativ və bərpaolunan enerjini də qitəyə ixrac etmək niyyətindədir.
Ekspert deyib ki, Prezident İlham Əliyevin qeyri-neft sektorunun inkişafı istiqamətində həyata keçirdiyi iqtisadi siyasətin nəticəsi olaraq 2023-cü ildə “Masdar” şirkəti ilə əməkdaşlıq çərçivəsində Xəzər regionunun və MDB məkanının ən böyük Günəş elektrik stansiyası olan 230 MVt gücündə “Qaradağ” Günəş Elektrik Stansiyası istifadəyə verilib. Stansiya 262 milyon ABŞ dolları dəyərində xarici sərmayə hesabına tikilib və ölkəmizdə xarici investisiya cəlb edilməklə reallaşdırılan sənaye miqyaslı ilk Günəş elektrik stansiyasıdır. Stansiyada hər il 500 milyon kilovat-saat elektrik enerjisi istehsal edilməklə 110 milyon kubmetr həcmində təbii qaza qənaət ediləcək. “ACWA Power” şirkəti ilə əməkdaşlıq çərçivəsində isə 240 MVt gücündə "Xızı-Abşeron" Külək Elektrik Stansiyasının tikintisi davam edir. Ötən il “ACWA Power” şirkəti ilə “Dənizdə 1,5 QVt-dək külək layihəsinin həyata keçirilməsinə dair İcra Müqaviləsi”, “Quruda 1 QVt külək stansiyasının yaradılmasına dair İcra Müqaviləsi” və “Azərbaycan Respublikasında enerji saxlanc sistemlərinin inkişaf etdirilməsinə dair anlaşma memorandumu” imzalanıb. Bütün bunlar yaxın gələcəkdə Azərbaycanı elektrik enerjisi ixracatçısına çevirəcək: “Əlbəttə ki, bu prosesləri Avropa dövlətləri, eləcə də Almaniya müşahidə edir və ölkəmizin etibarlı tərəfdaş olduğuna güvənərək iqtisadiyyatın bütün sahələrində əməkdaşlığı daha da artırmaq istəyir ki, enerji təhlükəsizliyini təmin etsin. Artıq SOCAR başda olmaqla Azərbaycan şirkətləri Almaniyanın "Uniper" və "SAP SE" kimi qabaqcıl enerji və texnologiya nəhəngləri ilə əməkdaşlıq edir. Bu əməkdaşlığın genişlənməsi tərəflər üçün faydalı olar. Yaradılan Biznes Şurasına daxil olan yerli biznes strukturları Almaniyanın nəhəng şirkətləri əlaqələr qurub sərmayə cəlb etməyə nail ola bilərlər. Almaniyada fəaliyyət göstərən iri avtomobil istehsalçıları Azərbaycanda da müəssisələr aça bilər. Almaniyanın avtomobil sənayesində fəaliyyət göstərən şirkətlər hazırda müasir trendə uyğun olaraq elektromobil istehsalına başlayıb. Bu avtomobillərin müəyyən hissələrinin Azərbaycanda istehsal edilməsi üçün birgə müəssisələr yaradıla bilər”.
M.İmanova qeyd edib ki, ölkəmizdə sənaye, kənd təsərrüfatı, nəqliyyat, tikinti, ticarət və xidmət sahələrində Almaniya investisiyalı 200-dən çox müəssisə fəaliyyət göstərir. İndiyədək Almaniyadan Azərbaycana yönəldilmiş birbaşa investisiyaların ümumi həcmi 937,5 milyon ABŞ dolları təşkil edib. Bu vəsaitin 53,4 milyon dolları neft-qaz, 884,1 milyon dolları isə qeyri-neft-qaz sektorunun payına düşür. Azərbaycandan Almaniyaya yönəldilmiş birbaşa investisiyaların həcmi isə 667,5 milyon ABŞ dolları olub. Lakin hər iki ölkə iqtisadi potensialı sayəsində bu rəqəmləri dəfələrlə artıra, fəaliyyətdə olan şirkətlərin gəlirlərinin və əlbəttə ki, hər iki dövlətin büdcəsinə daxilolmaların sayını da artıra bilər. Bunlardan başqa Azərbaycanın kənd təsərrüfatı potensialı da böyükdür. Avropa bazarlarında yerli meyvə-tərəvəzə tələbat var və bu tələbatı ödəmək üçün keyfiyyətli məhsul istehsal edib ixrac etmək olar. Bütün bu məsələlər Azərbaycan-Almaniya Biznes Şurasının gündəliyində olacaq və iki ölkə arasındakı münasibətlərin yeni mərhələsinin uğurlu olacağı şübhə doğurmur”.
Bölmənin digər xəbərləri
