Elbay Qasımzadə: 20 ildə şəhərsalma və memarlıq sahəsində əsl dönüş yaranıb
Bakı, 25 oktyabr, AZƏRTAC
Memarlıq və şəhərsalma mədəniyyəti xalqımızın tarixində çox mühüm yer tutur. Bu baxımdan Azərbaycanın tarixi irsi dövlət rəhbərinin daim diqqət mərkəzində olub. Artıq 20 ildir Prezident İlham Əliyev Azərbaycana rəhbərlik edir. Bu dövrdə respublika böyük inkişaf yolu keçib, dünya səviyyəsində Azərbaycanın siyasi nüfuzunun yüksəldilməsi sahəsində nəhəng işlər görülüb. Bununla yanaşı, şəhərsalma və memarlıq sahəsində də əsl dönüş yaranıb, ölçüyəgəlməz işlər həyata keçirilib.
Bunu AZƏRTAC-a Azərbaycan Memarlar İttifaqının sədri Elbay Qasımzadə Prezident İlham Əliyevin fəaliyyəti dövründə memarlıq və şəhərsalma sahəsində həyata keçirilən islahatlar və irimiqyaslı layihələrdən danışarkən deyib.
O bildirib ki, əslində, 20 il böyük müddət deyil. Lakin həmin dövr ərzində paytaxt Bakının siması inanılmaz dərəcədə dəyişib. İqtisadi cəhətdən inkişaf etməyən ölkənin nə şəhərsalma, nə də memarlıq görkəmi ola bilər. Bakıda bunların hər ikisi var. Paytaxtın bir sıra rayonlarında böyük abadlıq və yenidənqurma işləri aparılıb, yeni ictimai və yaşayış binaları inşa edilib. Son zamanlar isə Bakının yeni Baş planı tərtib olunub, hazırda təsdiqdədir. Bunlar memarlıq və şəhərsalma sahəsinə dövlətimizin başçısı tərəfindən göstərilən diqqət və qayğının bariz nümunəsidir. Eyni zamanda, Bakı ilə yanaşı Sumqayıt, Gəncə və respublikanın digər şəhərləri də inkişaf edir. Son 3 ildə isə işğaldan azad edilmiş ərazilərdə böyük quruculuq işləri gedir. Prezident İlham Əliyev gərgin iş qrafikinə baxmayaraq, daim bölgələrə səfərlər edir, görülən tikinti və quruculuq işləri ilə bilavasitə maraqlanır. Bu günlərdə isə dövlət başçısı Qarabağda və Sumqayıt şəhərində aparılan genişmiqyaslı işlərlə yaxından tanış olub. Bütün bunlar ölkə rəhbərinin həm də memarlığa və şəhərsalmaya göstərdiyi diqqətin nəticəsidir.
E.Qasımzadə qeyd edib ki, işğaldan azad edilmiş Qarabağda və Şərqi Zəngəzurda yol infrastrukturu tamamilə yenilənib. Mühəndis qurğularının üzərində ciddi iş aparılır. Bir neçə böyük transformator qurğuları artıq inşa edilib və istifadədədir. Bütün şəhərlərin Baş planları üzərində iş aparılır, bir qismi isə artıq tamamlanıb. Belə ki, Ağdamın Baş planı təsdiqlənib, digər şəhərlərin də Baş planı yekunlaşmaq ərəfəsindədir.
“Baş planlar ən müasir tələblərə cavab verən yeni şəhərlərin yaranması üçün zəmin yaradır. Təəssüf ki, bu şəhərlər erməni işğalçıları tərəfindən darmadağın edilib. Amma şəhər və qəsəbələr yenidən bərpa edilərək tam müasir şəkildə sakinlərin istifadəsinə veriləcək. Burada insanların normal yaşayışı üçün zəruri infrastruktur yaradılacaq. Həyata keçirilən böyük miqyaslı işlər onu göstərir ki, dövlət başçısının 20 illik fəaliyyəti dövründə ölkənin iqtisadi inkişafı və quruculuq işləri istiqamətində həyata keçirdiyi işlər hələ başlanğıcdır. Prezident İlham Əliyev Azərbaycan xalqının dəstəyi ilə daha böyük nailiyyətlər qazanacaq və ölkəmizi daha yüksək səviyyədə təmsil edəcək”, - deyə o, fikrini yekunlaşdırıb.
Bölmənin digər xəbərləri
