London, 24 iyun, AZƏRTAC

London Universitet Kollecində (UCL) dövlət idarəetməsi və liderlik ixtisası üzrə magistratura təhsili alan azərbaycanlı tələbə Elmira Babayeva hesab edir ki, xaricdə qazanılan bilik və təcrübənin əsas məqsədi Azərbaycanın inkişafına töhfə verməkdir. O, AZƏRTAC-a müsahibəsində təhsil yolu, beynəlxalq fəaliyyətləri, Londonda təşkil etdiyi Novruz tədbiri, İsveçrədə keçirilən Avropa Gənclər Sammiti 2026-da iştirakı və gələcək planlarından danışıb.

-Özünüz haqqında qısa məlumat verməyinizi istərdik.

-Bakalavriat təhsilimi ADA Universitetində beynəlxalq münasibətlər ixtisası üzrə yüksək akademik göstəricilərlə başa vurmuşam. Təhsil müddətində və sonrakı dövrdə müxtəlif dövlət qurumlarında və beynəlxalq layihələrdə fəaliyyət göstərmişəm. Azərbaycan Respublikasının Xarici İşlər Nazirliyində diplomatik təcrübə keçmiş, hazırda isə Azərbaycanın Britaniyadakı səfirliyində təcrübəçi kimi fəaliyyət göstərirəm.

Bununla yanaşı, COP29 çərçivəsində Prezidentlik Ofisinin Danışıqlar Komandasına dəstək göstərmiş, 17-ci İqtisadi Əməkdaşlıq Təşkilatının (ECO) Zirvə Toplantısında Protokol Xidmətinin əsas komandasının üzvü olmuşam. ABŞ Dövlət Departamentinin “Study of the U.S. Institutes for Student Leaders” proqramında iştirak etmiş, müxtəlif beynəlxalq forum və sammitlərdə ölkəmizi təmsil etmişəm. İnanıram ki, əldə etdiyim bilik və təcrübələr gələcəkdə Azərbaycanın dövlət idarəçiliyi və beynəlxalq əməkdaşlıq sahələrinə töhfə verməyim üçün möhkəm zəmin yaradır.

-Bu ixtisası seçməyinizin səbəbi nədir? Gələcəkdə bu sahədə hansı məqsədləriniz var?

-Dövlət idarəçiliyi və liderlik sahəsinə marağım uzun illər ərzində formalaşıb. Həm akademik fəaliyyətim, həm də dövlət qurumlarında qazandığım təcrübə mənə göstərdi ki, müasir dövrdə effektiv idarəetmə, strateji düşüncə və peşəkar liderlik dövlətlərin inkişafında həlledici rol oynayır. Məhz buna görə UCL-də dövlət idarəetməsi və liderlik proqramını seçdim. Bu proqram dövlət siyasətinin hazırlanması və icrası, təşkilati idarəetmə, liderlik, iqtisadi analiz və qərarvermə prosesləri üzrə dərin biliklər təqdim edir. Mənim üçün bu ixtisas yalnız akademik seçim deyil, həm də ölkəmə xidmət etmək istiqamətində strateji bir addımdır. Gələcəkdə məqsədim əldə etdiyim beynəlxalq təcrübə və bilikləri Azərbaycanda dövlət idarəçiliyinin daha da təkmilləşdirilməsi, institusional inkişaf və insan kapitalının gücləndirilməsi istiqamətində tətbiq etməkdir. Xüsusilə dövlət siyasətinin hazırlanması və icrası, strateji planlaşdırma və liderlik sahələrində fəaliyyət göstərərək ölkəmizin inkişafına töhfə vermək istəyirəm.

-“Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” çərçivəsində təhsil alırsınız. Bu proqramın gənclər üçün yaratdığı imkanları necə qiymətləndirirsiniz?

-Bu proqramı Azərbaycanın insan kapitalına yönəlmiş ən strateji investisiyalarından biri hesab edirəm. Bu proqram gənclərə dünyanın nüfuzlu universitetlərində təhsil almaq, qabaqcıl bilik və bacarıqlara yiyələnmək, beynəlxalq şəbəkələr qurmaq və qlobal təcrübə qazanmaq imkanı yaradır. Ən vacib məqamlardan biri odur ki, proqram yalnız fərdi inkişafı deyil, eyni zamanda, ölkənin gələcək inkişafını hədəfləyir. Xaricdə təhsil alan gənclər əldə etdikləri bilik və təcrübələri sonradan Azərbaycana gətirərək müxtəlif sahələrin inkişafına töhfə verirlər. Mən də bu proqramın iştirakçısı olaraq onun yaratdığı imkanları şəxsən yaşamışam və hesab edirəm ki, bu təşəbbüs Azərbaycanın gələcək liderlərinin, mütəxəssislərinin və dövlət qulluqçularının yetişdirilməsində mühüm rol oynayır.

-Londonda Novruz bayramına həsr olunmuş tədbir təşkil etmisiniz. Bu tədbiri keçirmək ideyası necə yarandı? Xarici tələbələr Novruz ənənələri, Azərbaycan rəqsləri və mədəniyyəti ilə tanış olduqdan sonra hansı təəssüratlarını bölüşdülər? Onların ən çox maraq göstərdiyi məqamlar nələr idi?

-Xaricdə təhsil aldığım müddətdə Azərbaycanın zəngin mədəni irsini və milli dəyərlərini beynəlxalq auditoriyaya tanıtmağın vacibliyini daha dərindən hiss etdim. Novruz tədbirinin təşkili ideyası da məhz bu düşüncədən yarandı. Tədbir Londonda yerləşən və Kral III Çarlzın himayəsi altında fəaliyyət göstərən “Goodenough” Kollecində təşkil olundu. Qeyd etmək istərdim ki, bu nüfuzlu və beynəlxalq səviyyədə tanınan kollecdə Novruz bayramına həsr olunmuş tədbir ilk dəfə olaraq təşkil edilirdi. Bu fakt tədbirin həm maraq, həm də diqqət baxımından daha geniş rezonans doğurmasına və yüksək səviyyədə qəbul olunmasına səbəb oldu.

Tədbirin məqsədi bayramı qeyd etmək və eyni zamanda, iştirakçılara Novruzun fəlsəfəsini, Azərbaycan xalqının ənənələrini və mədəni irsini təqdim etmək idi. Tədbirdə milli musiqimiz, rəqslərimiz, Novruz adət-ənənələri və milli mətbəximiz nümayiş etdirildi.

Xarici iştirakçılar xüsusilə Novruzun birlik, yenilənmə, həmrəylik və sülh mesajını yüksək qiymətləndirdilər. Onların diqqətini ən çox cəlb edən məqamlar tonqal ənənəsi, Novruzun dörd çərşənbə konsepsiyası, milli rəqslərimiz və Azərbaycan mətbəxinin rəngarəngliyi oldu. Bir çox iştirakçı Azərbaycanın zəngin mədəniyyətini daha yaxından tanımaq istədiklərini və ölkəmizə səfər etməyi planlaşdırdıqlarını bildirdi ki, bu da tədbirin əsas məqsədinə nail olduğunu göstərir.

-Sizcə, belə tədbirlər Azərbaycanın mədəniyyətinin beynəlxalq səviyyədə tanıdılması baxımından nə dərəcədə əhəmiyyətlidir?

-Hesab edirəm ki, belə təşəbbüslər Azərbaycanın yumşaq güc potensialının gücləndirilməsi baxımından xüsusi əhəmiyyət daşıyır. Mədəniyyət xalqları bir-birinə yaxınlaşdıran ən təsirli vasitələrdən biridir.

Bu cür tədbirlər vasitəsilə insanlar Azərbaycan haqqında məlumatları yalnız kitablardan və ya xəbərlərdən deyil, birbaşa təcrübə yolu ilə əldə edirlər. Bu isə ölkəmiz haqqında daha obyektiv və müsbət təsəvvür formalaşdırır. Qloballaşan dünyada mədəni diplomatiya dövlətlərin beynəlxalq nüfuzunun formalaşmasında mühüm rol oynayır və mən inanıram ki, xaricdə yaşayan azərbaycanlı gənclər bu istiqamətdə vacib missiya daşıyırlar.

-Bu il İsveçrənin Cenevrə şəhərində keçirilən Avropa Gənclər Sammiti 2026 proqramında iştirak etmisiniz. Bu sammit barədə məlumat verərdiniz? Sammitdə hansı mövzular müzakirə olunurdu və siz hansı sessiyalarda iştirak etdiniz? Azərbaycanı beynəlxalq platformalarda təmsil etmək sizə hansı məsuliyyəti hiss etdirir?

-Avropa Gənclər Sammiti 2026 (European Youth Summit) müxtəlif ölkələrdən gələn gənc liderləri, tələbələri və mütəxəssisləri bir araya gətirən beynəlxalq platformadır. Sammit diplomatiya, liderlik, qlobal əməkdaşlıq, gənclərin qərarvermə proseslərində iştirakı və mədəniyyətlərarası dialoq kimi mövzular ətrafında təşkil olunmuşdu. Mən xüsusilə liderlik, diplomatiya, beynəlxalq əməkdaşlıq və gənclərin ictimai iştirakçılığı ilə bağlı sessiyalarda iştirak etdim. Müxtəlif ölkələrdən olan iştirakçılarla fikir mübadiləsi aparmaq və müxtəlif idarəetmə təcrübələrini öyrənmək mənim üçün olduqca dəyərli təcrübə idi. Azərbaycanı beynəlxalq platformalarda təmsil etmək böyük qürur olmaqla yanaşı, eyni zamanda, ciddi məsuliyyətdir. Belə tədbirlərdə hər bir iştirakçı müəyyən mənada öz ölkəsinin nümayəndəsinə çevrilir. Buna görə də hər zaman ölkəmizin uğurlarını, dəyərlərini və inkişaf perspektivlərini ən layiqli şəkildə təqdim etməyə çalışıram.

-Xaricdə yaşayan və təhsil alan azərbaycanlı gənclərin ölkəmizin tanıdılmasında rolu barədə nə düşünürsünüz?

-Məncə, xaricdə təhsil alan azərbaycanlı gənclər ölkəmizin qeyri-rəsmi səfirləri rolunu oynayırlar. Onlar gündəlik fəaliyyətləri, akademik nailiyyətləri və ictimai təşəbbüsləri vasitəsilə Azərbaycan haqqında müsbət təsəvvür formalaşdırırlar. Bu gənclər yalnız öz sahələrində uğur qazanmaqla kifayətlənmirlər, eyni zamanda, ölkəmizin mədəniyyətini, tarixini və müasir inkişafını beynəlxalq auditoriyaya çatdırırlar. Bu baxımdan onların fəaliyyəti Azərbaycanın beynəlxalq imicinin gücləndirilməsinə mühüm töhfə verir.

-Təhsil və ictimai fəaliyyət sahəsində bundan sonrakı planlarınız nələrdir?

-Hazırda əsas məqsədim magistratura təhsilimi uğurla başa vurmaq və əldə etdiyim bilikləri praktik fəaliyyətlə daha da zənginləşdirməkdir. Gələcəkdə dövlət idarəçiliyi, diplomatiya və ictimai siyasət sahələrində fəaliyyət göstərərək ölkəmizin inkişafına töhfə vermək istəyirəm. Bununla yanaşı, gənclərin inkişafı, beynəlxalq əməkdaşlıq və Azərbaycanın beynəlxalq səviyyədə tanıdılması istiqamətində layihələrdə iştirak etməyi planlaşdırıram. İnanıram ki, hər bir gənc əldə etdiyi bilik və təcrübəni ölkəsinin inkişafı naminə səfərbər etməlidir və mən də fəaliyyətimi bu prinsip üzərində qurmağa çalışıram.

-Xaricdə təhsil almağı arzulayan azərbaycanlı gənclərə hansı tövsiyələri verərdiniz?

-İlk növbədə, gənclərə tövsiyə edərdim ki, qarşılarına böyük hədəflər qoymaqdan çəkinməsinlər. Xaricdə təhsil yalnız akademik nailiyyət deyil, həm də şəxsi inkişaf, liderlik bacarıqlarının formalaşması və dünyagörüşünün genişlənməsi üçün mühüm fürsətdir. Bunun üçün güclü akademik baza formalaşdırmaq, xarici dil biliklərini inkişaf etdirmək, ictimai fəaliyyətlərdə iştirak etmək və daim öz üzərində çalışmaq vacibdir.

Eyni zamanda, unutmaq olmaz ki, xaricdə təhsil almağın əsas məqsədi yalnız fərdi uğur əldə etmək deyil, qazanılan bilik və təcrübəni gələcəkdə Azərbaycanın inkişafına yönəltməkdir. Mən inanıram ki, bugünkü gənclərimiz ölkəmizin gələcəyinin qurucularıdır və onların uğurları Azərbaycanın uğurlarına çevriləcəkdir.