Elşad Haqverdi: Türkiyə-Azərbaycan Vizyon Teatrı iki qardaş ölkə arasındakı mədəniyyət körpüsüdür
İstanbul, 23 mart, AZƏRTAC
Azərbaycan-Türkiyə qardaşlığı artıq bütün dünyaya bəlli olan danılmaz həqiqətdir. Çox əzəmətli keçmişə malik bu birlik bütün insanlıq üçün nümunədir. İki qardaş ölkə arasında əsirlərboyu davam edən bu birliyin yaşadılması da hər iki xalq üçün vacibdir və bir nəfər kimi hər kəs hər sahə üzrə bu birliyə öz töhfəsini verməyə çalışır. Belə birliyin ən gözəl nümunələrindən biri də İstanbulda fəaliyyət göstərən Türkiyə-Azərbaycan Vizyon Teatrıdır.
Bu fikirləri AZƏRTAC-a müsahibəsində Türkiyə-Azərbaycan Vizyon Teatrının meneceri Elşad Hakverdi bildirib.
Teatrı iki qardaş dövlət arasında “mədəniyyət körpüsü” adlandıran həmsöhbətimiz deyib: “Əvvəlcə onu demək istərdim ki, İkinci Qarabağ müharibəsində Azərbaycan Prezidenti İlham Əliyevin dəqiq qərarları ilə qazanılan Vətən müharibəsi və Türkiyə Prezidenti Rəcəb Tayyib Ərdoğanın hər platformada daim Azərbaycanın yanında olduğunu bildirməsi Türkiyədə fəaliyyət göstərən azərbaycanlılar olaraq bizi çox qürurlandırdı. Bu qələbənin bizə verdiyi ruhla dövlətlərimiz arasındakı birliyi daha da gücləndirmək naminə yeni layihələrimiz üzərində böyük həvəs və inamla işlərimizi daha böyük həvəslə davam etdiririk. Ulu öndər Heydər Əliyevin dediyi kimi biz “bir millət, iki dövlətik”. Tanrı bu birliyi daim qorusun”.
O, bu mədəniyyət ocağının 2016-cı ildə Azərbaycan Dövlət Akademik Musiqili Teatrının aktyoru Elçin İmanov və Kəmalə Kamal tərəfindən qurulduğunu bildirib: “Teatrımızın quruluşçu rəssamı Tariyel Əlizadə, quruluşçu dizayneri isə Fateh Hüseyndir. İlk tamaşamız Firuz Mustafanın “Maneken” əsəri üzərində qurulub. Bu tamaşa İstanbulda nümayiş etdirildikdən sonra beynəlxalq festivala dəvət alıb və Vətənimizi layiqincə təmsil edib. Hətta uğurlu çıxışa görə mükafata da layiq görülüb. Daha sonra əsrin faciəsi adlandırılan Xocalı soyqırımını Türkiyə, eləcə də dünya tamaşaçısına daha da yaxından tanıtmaq üçün “Adsız qadın” əsərini səhnələşdirdik. Tamaşanın rejissoru Elçin İmanov, ssenari müəllifi isə Aygün Həsənoğlu idi. Səhnə əsəri İstanbul Dövlət Teatrında, İstanbul Böyükşəhər Bələdiyyəsinin səhnəsində və bir çox digər yerlərdə oynanıldı. İstanbulda böyük səs gətirən tamaşa minlərlə insana bu soyqırımı tanıtmaq üçün ən gözəl vasitə oldu”.
Teatrda böyüklərlə yanaşı, uşaq üçün də çox sayda tamaşanın hazırlandığını qeyd edən E.Hakverdi hazırda bir neçə əsərin səhnələşdirilməsi istiqamətində işlərin davam etdiyini deyib: “Gələcəkdə tamaşaçılarımıza təqdim edəcəyimiz əsərlərimiz haqqında yaxın vaxtlarda geniş məlumat verəcəyik. Hazırda isə Azərbaycan ədəbiyyatının görkəmli nümayəndəsi, böyük dramaturq, nasir, publisist və teatr təşkilatçısı, tanınmış ictimai xadim Əbdürrəhim bəy Haqverdiyevin anadan olmasının 150 illiyi münasibətilə “Yeyərsən qaz ətini, görərsən ləzzətini” komediyasının gərgin məşqləri davam edir. Səhnə əsərinin rejissoru Mine Bayrakeri, məsləhətçisi isə Elçin İmanovdur. Bu tamaşanın musiqi tərtibatı və kostyumları Lətafət Rafiqqızına, xoreoqrafiyası isə Rafiz Mehdizadəyə aiddir. Tamaşada baş rollarda Bülənt Altay, Kəmalə Cabbarova, Nigar Bahadırqızı, digər rollarda isə Azərbaycan və Türkiyə aktyorları iştirak edəcəklər. Tamaşa hazır olduqdan sonra İstanbulun ən gözəl teatr səhnələrindən birində premyerasının keçirilməsi nəzərdə tutulur. Tamaşada hadisələr Qarabağda baş verdiyindən oyun Şuşanın köhnə görüntüləri ilə başlayır. Bundan başqa gənc rejissor Bircan Çakırın quruluşunda “Tık-tık xanım” və başqa uşaq tamaşalarını da balaca tamaşaçılarımız üçün hazırlayırıq”.
Martın 3-də mədəniyyət naziri Anar Kərimovun Türkiyəyə səfəri zamanı İstanbulda qardaş ölkədə yaşayan və fəaliyyət göstərən bir qrup azərbaycanlı incəsənət xadimi ilə görüşündə teatrın rəhbəri Kəmalə Kamal və teatr kollektivinin də iştirak etdiyini deyən həmsöhbətimiz bu görüş zamanı gələcək planların müzakirə edildiyini, teatrın hazırkı vəziyyəti və fəaliyyətləri barədə nazirə məlumat verildiyini bildirib.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
