İDMAN
ELSEVƏRİN QIZIL ƏLLƏRİ
Noyabrın 3-də Kiyevdə universal döyüş üzrə IV dünya çempionatı başa çatmışdır. İdmançılarımızdan Kənan Mehdiyev (70 kq) və Samir İlyaslı (80 kq) gümüş medal, Zaur İslamov isə (90 kq) bürünc medal qazanmışlar.
AZƏRTAC-ın Ukraynadakı xüsusi müxbirinin bundan əvvəl xəbər verdiyi kimi, çempionatda hakimlərin qərəzkarlığı üzündən Elsevər Bağırov (95 kq) qızıl medaldan məhrum olmuşdu. Lakin nümayəndə heyətimizin şikayətindən sonra hakimlər kollegiyasının qərarı ilə Elsevər haqlı olaraq, çempionatın qızıl medalına layiq görülmüşdür.
Laçın rayonunun 26 yaşlı sakini E.Bağırov “Gömrük” idman cəmiyyətində məşğul olur və Azərbaycan Dövlət Bədən Tərbiyəsi və İdman Akademiyasının beşinci kurs tələbəsidir.
Dekabrın 1-də Azərbaycanın Ukraynadakı səfirliyində səfir Tələt Əliyev komandamızın üzvləri ilə görüşmüşdür. O, komandanın rəhbərliyini və idmançılarımızı uğurlu çıxış münasibətilə təbrik edərək, onlara hədiyyələr bağışlamışdır.