Əməkdar məşqçi Habil Hümbətov: Ölkəmizdə budo idman növünə maraq böyükdür
Bakı, 3 may, AZƏRTAC
İdmana Əməkdar məşqçi Nəriman Abdullayevin rəhbərliyi ilə boks idman növü ilə başlamışam. Azərbaycan çempionatlarında və beynəlxalq turnirlərdə iştirak etmişəm. Azərbaycan Dövlət Bədən Tərbiyəsi və İdman Akademiyasında təhsil aldığım dövrdə ölkə çempionu olmuşam. Eyni zamanda, boks turnirlərində dəfələrlə uğurlar qazanmışam. Hərbi xidmətdə olduğum 2007-2008-ci illərdə hərbçilər arasında keçirilən yarışda da qızıl medala sahib olmuşam. Hərbi xidmətdən qayıtdıqdan sonra məşqçiliyə başlamışam. Məşqçilik dövründə bir neçə yetirməm Avropa və dünya çempionu olub. Onlar Azərbaycan Budo Döyüş Növləri Federasiyasının tərkibində keçirilən yarışlarda qalib adını qazanıblar. Hazırda həm təhsilimi, həm də idmanla məşğul olmağı davam etdirirəm. Eyni zamanda, yarışlara hazırlaşır, həm də tələbələrimi yetişdirirəm.
Bu sözləri AZƏRTAC-a Azərbaycan Budo Döyüş Növləri Federasiyasının baş məşqçisi, Avropa, dünya çempionu, beynəlxalq dərəcəli idman ustası, Əməkdar məşqçi Habil Hümbətov idmanın bu növünün ölkəmizdə inkişaf perspektivləri barədə danışarkən deyib.
H.Hümbətov bildirib ki, budo idmanını ilk dəfə ölkəmizə 2008-ci ildə X dan qara kəmər, qrand-master Faiq Rəfiyev gətirib. Burada bir neçə növ var. Bunlar sem kontakt, full kontakt, fri kontakt, lay kontakt, S1, F1, B1 və katalardır. B1 qaydasında rinqin içində döyüşürsən. F1 qaydasında isə həm güləş var, həm də yumruq-təpik olur. Budo döyüş yolu deməkdir. Hazırda yaratdığım klub Azərbaycan Budo Döyüş Növləri Federasiyası ilə sıx əməkdaşlıq edir. Tələbələrim federasiyanın yarışlarında nailiyyətlər qazanırlar. Onlar həm boks, həm kikboksinq, həm də budo yarışlarına çıxırlar.
Məşqçi qeyd edib ki, gənclərimiz budoya gündən-günə daha çox maraq göstərirlər. Prezident İlham Əliyevin idmana göstərdiyi qayğı gənclərimizdə bu sahəyə daha çox həvəs yaradır. Çünki idmanda uğur qazandıqdan sonra onlara dövlətimiz tərəfindən dəstək göstərilir. Əvvəllər 17-18 yaşlı uşaqlar idmana maraq göstərirdisə də, indi azyaşlılar da idmanla məşğul olmaq istəyirlər. Valideynlər də övladlarının idmanla məşğul olmasında maraqlıdırlar. Azərbaycan Budo Döyüş Növləri Federasiyasının son vaxtlar keçirdiyi yarışlar göstərir ki, ölkədə bu idman növü ilə məşğul olmağa həvəs daha da çoxalıb.
Budoda uğur qazanan idmançılarımız çoxdur. İbrahim Məmmədov budo üzrə beşqat dünya çempionu, eləcə də Avropa və Asiya çempionudur. Digər idmançımız Abbasqulu Hümbətov da budo üzrə dünya çempionatında bir dəfə qalib olub, üç dəfə ikinci, bir dəfə üçüncü yeri tutub. Həmçinin respublika və Avrasiya çempionluğu var.
“İyirmi üç ildir idmanla məşğul oluram. İdman böyük məsuliyyətdir. Hər uşaq fərqli ailədən idmanla məşğul olmağa gəlir, ona görə də onların psixologiyaları müxtəlifdir. Balaca uşaqları hazırlamaq məsuliyyət tələb edir", - deyə məşqçi əlavə edib.
Avropa, dünya çempionumuz diqqətə çatdırıb ki, idmanda düzgün rejimə əməl etmək və qidalanmaq mühüm amildir. Məşq proseslərində məşqçinin təlimatına uyğun hərəkət edilməlidir. Eyni zamanda, idmançı özü də əlavə məşqlər etməlidir. İdmanda qarşıya məqsəd qoyaraq inkişaf etmək mümkündür. Yarışlara davamlı hazırlaşmaq vacibdir.
Mayın 3-6-da Bakı İdman Sarayında keçiriləcək ümummilli lider Heydər Əliyevin xatirəsinə həsr olunmuş budo döyüş növləri üzrə beynəlxalq turnir barədə danışan Əməkdar məşqçi deyib ki, yarış Gənclər və İdman Nazirliyinin və Azərbaycan Budo Döyüş Növləri Federasiyasının birgə təşəbbüsü ilə təşkil ediləcək. Turnirdə Azərbaycan, Pakistan, İraq, Əfqanistan, İran, Gürcüstan, Özbəkistan, Zimbabve, Türkiyə, Kipr, Rusiya, Banqladeş və Hindistandan olan 600-ə yaxın idmançı çıxış edəcək. Yarışlarda budoçular böyüklər, gənclər, uşaqlar və yeniyetmələr kateqoriyalarında mübarizə aparacaqlar. Turnir semi-kontakt, ful-kontakt, fri-kontakt, layt-kontak, sabaki-citsu, submission, B-1, F-1 və S-1 qaydaları üzrə keçiriləcək. Yarışa ciddi hazırlaşırıq. Turnir ulu öndər Heydər Əliyevin xatirəsinə həsr olunduğu üçün komandamızın üzvləri kuboku qazanmaq üçün əlindən gələni edəcəklər.
Qeyd edək ki, yarışın açılış mərasimi mayın 4-də saat 15:00-da başlayacaq.
Bölmənin digər xəbərləri
