Erməni icması üçün Marsel qarmağı
Bakı, 24 avqust (AZƏRTAC). “Fransa deputatlarının Dağlıq Qarabağa səfəri rəsmi xarakter daşımamışdır, bu səfər bir qrup deputatın şəxsi təşəbbüsü ilə həyata keçirilmişdir”. Fransa Milli Məclisinin deputatlarının Azərbaycanın Ermənistan tərəfindən işğal edilmiş Dağlıq Qarabağ regionuna səfərinə Fransa Xarici İşlər Nazirliyinin rəsmi münasibəti belədir. Bu səfərlə əlaqədar Azərbaycanın Parisdəki səfirliyi Fransa XİN-ə etiraz notası göndərmiş, bundan sonra XİN-dən aşağıdakı məzmunda bəyanat alınmışdır: “Bu səfər Fransa Milli Məclisinin xətti üzrə deyil, Fransa Milli Məclisinin milli müdafiə və silahlı qüvvələr komissiyasının sədri, Xalq Hərəkatı Uğrunda İttifaq Parlament Fraksiyasının üzvü Gi Tesyenin şəxsi təşəbbüsü ilə həyata keçirilmişdir”.
Fransa xarici siyasət idarəsinin mətbuat katibi Bernar Valero qeyd etmişdir ki, parlament üzvlərinə Parisin Dağlıq Qarabağ barədə mövqeyi haqqında lazımi qaydada xəbərdarlıq edilmişdi. Valero vurğulamışdır: “Bu səfər bu münaqişəyə münasibətdə Fransanın üzərinə heç bir öhdəlik qoymur və onun bu barədə siyasətini əsla dəyişmir. Ermənistan özü də daxil olmaqla beynəlxalq birliyin bütün ölkələri kimi, Fransa da bu ərazinin müstəqilliyini tanımır”.
Fransa Azərbaycanın notasına kifayət qədər operativ münasibət bildirmiş və ATƏT-in Minsk qrupunun həmsədri olmaqla, Ermənistan-Azərbaycan, Dağlıq Qarabağ münaqişəsinin həllində öz mövqeyini bir daha təsdiqləmişdir. Azərbaycanın Fransadakı səfiri Elçin Əmirbəyovun sözlərinə görə, etiraz notasında qeyd edilmişdir ki, belə bir addım Paris ilə ikitərəfli münasibətləri heç də yaxşılaşdırmır və ATƏT-in Minsk qrupunun həmsədri olan bir ölkə kimi Fransanın Ermənistan-Azərbaycan, Dağlıq Qarabağ münaqişəsinin tənzimlənməsi üzrə səylərinə ziyan vurur.
Fransız deputatlarının demarşına Fransanın rəsmi cavabına baxmayaraq, belə bir haqlı sual yaranır: Dağlıq Qarabağ münaqişəsinin tənzimlənməsində Azərbaycan ilə Ermənistan arasında vasitəçilik funksiyasını yerinə yetirən Minsk qrupunun həmsədri olan ölkənin deputatı öz şəxsi maraqlarını dövlətin mənafeyindən necə üstün tuta bilər? Xüsusən ona görə ki, Gi Tesye və Azərbaycanın Ermənistan tərəfindən işğal edilmiş ərazilərinə səfər etmiş Fransa parlamentinin digər deputatları bu ölkənin hakim partiyasının - Milli Assambleyada əksəriyyət təşkil edən (577 yerdən 313-ünə sahib olan) Xalq Hərəkatı Uğrunda İttifaqın üzvləridir.
Azərbaycanın Dağlıq Qarabağ bölgəsinə qanunsuz səfər etmiş nümayəndə heyətinin tərkibinə Gi Tesye ilə yanaşı Jak Remilye, Jorj Kolumbye və xanım Valiri Buaye də daxil idi. Bu deputatlar kimlərdir?
Fransa Milli Məclisinin saytında yerləşdirilmiş məlumata görə, Gi Tesye milli müdafiə və silahlı qüvvələr məsələləri üzrə parlament komitəsinin rəhbəri olmaqla bərabər, həm də Ermənistanla parlamentlərarası dostluq qrupunun katibidir. O, Marsel şəhərinin 5-ci sektorunun, Marselin inzibati mərkəzi olan Buş-dü-Ron rayonunun meridir. Jak Remilye xarici işlər üzrə parlament komitəsinin və Ermənistan ilə parlamentlərarası dostluq qrupunun katibidir. Jorj Kolumbye də həmin dostluq qrupunun katibidir. Valeri Buaye Ermənistanla dostluq qrupunun vitse-prezidenti və Buş-dü-Ron sektorunun vitse-meri, yəni Gi Tesyenin müavinidir.
Məlumdur ki, Fransanın bu şəhərində böyük erməni icması vardır. Marsel merinin müavini Jan Klod Qodenin müavini, etnik erməni Didye Parakyan Fransanın bu ikinci böyük şəhərində Ermənistanın və erməni separatçılarının maraqları üçün fəal lobbiçilik edir. Buradakı erməni icması demək olar ki, bütün hökumət və qeyri-hökumət strukturlarına təsir göstərə bilmişdir. Hətta, mer Jan Klod Qoden özü də erməni icmasını nümayişkaranə şəkildə dəstəkləyir, tez-tez Ermənistana səfər edir. Ermənilər onu hətta Fransada “erməni soyqırımı”nın inkar edilməsinə görə cəza haqqında qanun qəbul edilməsinin apologeti adlandırırlar.
Beləliklə, Marsel, ermənilərin özlərinin dediyi kimi, “Fransanın əsl erməni şəhəridir”. Fransız deputatların hərəkətini bununla izah etmək olar, onlar seçkilərdə ermənilərin səsini qazanmaq üçün erməni icmasına yarınmağa çalışırlar.
Daha bir sual yaranır: erməni separatçıları bu səfər nəticəsində nə qazanmışlar? Heç nə! Rəsmi Bakı bu regionda vəziyyət haqqında beynəlxalq birliyi yetərincə məlumatlandırmışdır. Dünyanın bütün dövlətləri Dağlıq Qarabağı Azərbaycanın ərazisi kimi tanıyır və mahiyyət etibarilə dünyanın bu region haqqında məlumatlı olması elə bundan ibarətdir. Fransız deputatların Azərbaycanın işğal edilmiş ərazilərinə qanunsuz səfəri dünya ictimaiyyətinin Azərbaycana və Dağlıq Qarabağ probleminə münasibətdə mövqeyində heç nəyi dəyişməmişdir və dəyişə də bilməz.
Bu səfərdən yalnız fransız parlamentariləri müəyyən dividendlər əldə etmişlər. Onların “Dağlıq Qarabağ ilə həmrəy olmaları” barədə, “müstəqillik elan etməyin zəruri olması” haqqında bəyanatlarının heç bir siyasi sanbalı yoxdur. Bu, sadəcə olaraq, siyasi tryuk, Marselin erməni icması üçün bir qarmaqdır. Vəssalam. Tesye özü Dağlıq Qarabağda səsləndirdiyi bəyanatlarında özünü inandırmağa çalışır ki, bu əraziyə səfər etməklə heç bir pis iş görmür: “Biz öz dostlarımızın yanına gəlməklə nə pis iş görürük?”. Bunu o adamlar deyir ki, onlar öz hərəkətlərinin düzgün olmadığını başa düşür, lakin müəyyən amillərin təsiri altında bunu etməyə məcburdurlar. Öz təqsirini başa düşən adamlar özlərinə bu yolla haqq qazandırırlar. Tesyenin Dağlıq Qarabağda dediyi bütün sözlər riyakarlıqdır, lakin o, Fransa parlamentinə növbəti seçkilərdə bu riyakarlıqdan səmərə gözləyir.
Son illərdə həyata keçirilmiş bu cür səfərlərin mahiyyətinə varanda bəzən yəqin edirsən ki, “erməni məsələsi” təkcə Fransada deyil, başqa ölkələrdə də siyasətçilərin əlində oyuncaq kimi bir şeydir. Onlara siyasi dividendlər lazımdır və bunun xatirinə onlar öz dövlətlərinin rəsmi siyasətinə tamam zidd olan sözlər danışmağa hazırdırlar. Ötən əsrin əvvəlində bu “məsələ”nin yarandığı vaxtdan keçən yüz il ərzində belə olmuşdur və göründüyü kimi indi də belədir.
Bölmənin digər xəbərləri
