Ermənistan vətəndaşının bayrağımızı yandırması onun beynəlxalq aləmdə nüfuzuna böyük zərbə vurdu – ŞƏRH
Bakı, 17 aprel, AZƏRTAC
Ağır atletika üzrə milli komandamızın üzvlərinin İrəvana səfəri ilə əlaqədar Ermənistan hökuməti təhlükəsizliyin təminatına dair zəmanət vermişdi. Buna baxmayaraq, Avropa çempionatının açılış mərasimində, xüsusən 40-a yaxın ölkənin iştirakı ilə canlı yayımlanan yarışda Ermənistan vətəndaşı tərəfindən Azərbaycanın Bayrağının yandırılması hadisəsi baş verdi. İdman yarışları tarixində baş nazirin iştirakı ilə digər ölkənin bayrağının yandırılması hadisəsi ilk dəfə idi baş verdi. Düşünürəm ki, Ermənistan vətəndaşının bu hərəkəti, xüsusilə Azərbaycan Bayrağının rəsmi akkreditasiya olunmuş şəxs tərəfindən nümayişkaranə şəkildə yandırılması hadisəsi əslində Ermənistan cəmiyyətində ölkəmizə qarşı nifrətin göstəricisi idi.
AZƏRTAC xəbər verir ki, bunu ehtiyatda olan polkovnik-leytenant, hərbi ekspert Elxan Şıxəliyev deyib.
“Biz tarixdən bilirik ki, ermənilər əsrlərlə öz genetik kodlarında azərbaycanlılara, türklərə qarşı nifrət bəsləyirdilər. Xüsusən də bu yaxınlarda düşmən ölkənin ordusunun təyinatının nədən ibarət olması barədə onların uşaqlarının videolarının sosial şəbəkələrdə yayımlanmasının şahidi olduq. Bağçalarda kiçik yaşlı uşaqlara, həmçinin orta məktəbdəki şagirdlərə Ermənistan ordusunun xüsusi təyinatlılarının azərbaycanlıları öldürmələri ilə bağlı təbliğat aparmalarının videolarını özləri sosial şəbəkələrdə yaymışdılar. Odur ki, Ermənistandan belə təxribatı gözləmək olardı. Bu təxribatla Ermənistan növbəti dəfə öz xislətini görsətdi. Amma Ermənistan vətəndaşının bayrağımızı yandırması onun beynəlxalq aləmdə nüfuzuna böyük zərbə vurdu. Bu hadisə Avropa ölkələrinə canlı yayımlanan tədbirin açılış mərasimində Ermənistan hökumətinin və xalqının hansı xislətdə olduğunun birbaşa nümayişi idi. Ermənistan vətəndaşının Azərbaycan Bayrağını beynəlxalq yarışda qadının əlindən alıb yandırması yolverilməzdir”, - deyə hərbi şərhçi əlavə edib.
Bildirilib ki, digər tərəfdən Silahlı Qüvvələrimizin hərbçiləri 44 günlük Vətən müharibəsində Azərbaycan Bayrağının yerinin harada olduğunu ermənilərə göstərmişdilər. Yaxın tariximizdə belə nümunə var. Beynəlxalq tədbirlərdə bayraqların yandırılması qəbuledilməzdir. Çünki dövlət rəmzi sayılan bayraq bir xalqın şərəf və ləyaqət simvoludur. Türklərin tarixində düşmən ölkələrin bayraqlarına yanaşma tərzimizin gözəl nümunələri var. Xüsusən 1922-ci ildə Qurtuluş savaşında İzmir yunan işğalından azad ediləndə o vaxt Atatürk demişdi ki, bayraq bir millətin şərəf və ləyaqət məsələsidir.
E.Şıxəliyevin sözlərinə görə, Azərbaycan Bayrağının bütün dünyanın gözü önündə yandırılması hadisəsi ilə Ermənistanın siyasi və dövlət imicinə bundan böyük mənfi zərbə vurmaq mümkün deyildi. Ermənistanın öz vətəndaşı bunu elədi. Bu təxribatla beynəlxalq qurumlar, xüsusən də siyasi institutlar bu ölkənin hansı xislətə malik olduğunun şahidi oldu. Növbəti addım kimi, beynəlxalq ictimaiyyət Ermənistanı qınamalı, ona sanksiyalar tətbiq etməli və belə böyük tədbirlərin keçirilməsini ona həvalə etməməlidirlər. Ermənistan növbəti ildə ağırlıqqaldırma üzrə dünya çempionatına ev sahibliyi edəcək. Düşünürəm ki, ağırlıqqaldırma üzrə beynəlxalq federasiya bu yarışın Ermənistanda keçirilməsini qadağan etməlidir. Həmin təxribatı törətmiş şəxsin hüquq-mühafizə orqanları tərəfindən məsuliyyətə cəlb edilməməsi və nümayişkaranə şəkildə sərbəst buraxmaları bir daha göstərdi ki, Ermənistan hakimiyyəti öz vətəndaşlarının azərbaycanlılara qarşı belə vandal hərəkət etməyə təşviq edir. Azərbaycanın dövlət rəmzlərinə qarşı bu kimi addımları atmaqla öz vətəndaşlarının mənfi nümunəsini göstərib.
“Ermənistanda bayrağımızın yandırılması Azərbaycan idmançılarına böyük psixoloji təsir etmişdi. Bu səbəbdən ağırlıqqaldırma millimizin yarışda iştirakından imtinası və ölkəmizə qayıtması barədə verilən qərar doğru idi. Ondan sonra türkiyəli qadın atletlərin də idmançılarımızın iştirak etmədiyi yarışdakı qələbələrini və qızıl medalını Azərbaycan xalqına ithaf etməsi ermənilərin təxribatına tutarlı cavab idi. Düşünürəm ki, Ermənistanla bağlı beynəlxalq təşkilatlar və idman federasiyaları tədbirlər görəcək”, - deyə polkovnik-leytenant vurğulayıb.
Hərbi ekspert Azərbaycanın Ermənistan idmançılarına yanaşması ilə əlaqədar bir nümunəni xatırladıb: “2015-ci ildə Bakıda Avropa Oyunları çərçivəsində keçirilmiş yarışda erməni idmançı mükafat qazananda onun medalını Prezident İlham Əliyev təqdim etdi. Dövlətimizin başçısı o zaman da bizim vətəndaşların zaldakı səslərini əl işarəsi ilə dayandıra bilmişdi. Bundan əlavə, Vətən müharibəsində əsgərlərimizin Ermənistan vətəndaşlarına necə yanaşmasının bariz nümunələrini televiziyadan izləmişik. Otuz il müddətində ərazilərimzin işğalının birbaşa təşkilatçısı olan, sonradan Ermənistanın müdafiə naziri, işğaldan sonra isə prezident olmuş Serj Sarkisyanın hətta bacısının Azərbaycanda yaşaması və sair faktlar mövcuddur. Bu coğrafiyadan nə ermənilər, nə də biz də köçüb gedən deyilik. Düşmənin də gərək ləyaqətli olsun. Görünür, düşmənimiz də əlinə imkan keçəndə bütün platformalarda azərbaycanlılara qarşı belə ləyaqətsiz mübarizə aparacağını özü üçün bayraq edib. Biz buna hər yerdə hazır olmalıyıq. 44 günlük müharibədə Azərbaycan Ordusu bayrağımızın şərəf və ləyaqətimiz olduğunu ermənilərə göstərdi. İnanıram ki, bundan sonra beynəlxalq idman yarışlarında da dövlətimizin rəmzini yüksəklərə qaldırmaqla qələbələr qazanacaqlar”.
Bölmənin digər xəbərləri
