Estoniya qeyri-leqal miqrasiya ilə mübarizədə Litvaya polis bölməsi göndərəcək
Riqa, 7 iyul, AZƏRTAC
Estoniyanın Polis və Sərhəd Mühafizə Departamenti Litva-Belarus sərhədində kütləvi qeyri-leqal miqrasiyanın qarşısının alınmasına yardım etmək məqsədilə Litvaya “ESTPOL5” polis bölməsini göndərəcək.
AZƏRTAC Estoniya mətbuatına istinadla xəbər verir ki, ölkənin Polis və Sərhəd Mühafizə Departamenti öz əməkdaşlarını bir ay müddətinə Litvaya göndərəcək.
Bildirilib ki, iyulun 7-də on nəfərdən ibarət komanda Estoniyadan Litvaya yola düşəcək. “ESTPOL5”in dəqiq vəzifələri əraziyə çatdıqdan sonra məlum olacaq. Litva əraziyə dronlarla baxış keçirilməsi, obyektlərin mühafizəsi və vəziyyətə nəzarət edilməsi kimi məsələlərdə Estoniyanın yardımına ehtiyac duyur.
Estoniyanın Polis və Sərhəd Mühafizə Departamentinin baş direktorunun müavini Eqert Beliçevin sözlərinə görə, Litvaya yardımın göstərilməsi Estoniya ilə Litva arasındakı ikitərəfli əməkdaşlığa dair imzalanmış müqavilənin bir hissəsidir.
“Böhranın həllində Litvanı dəstəkləyirik və keçirilən hər belə əməliyyat əməkdaşlarımıza dəyərli təcrübə qazandırır. Ümumi beynəlxalq əməkdaşlığa töhfə vermək də böyük əhəmiyyət kəsb edir və əgər Estoniya yardıma ehtiyac duyarsa, çətin vəziyyətdə bizi də dəstəkləyəcək müttəfiqlərimiz vardır”, - deyə E.Beliçev söyləyib.
Qeyd edilib ki, Estoniyanın Polis və Sərhəd Mühafizə Departamenti buna qədər Yunanıstan, Rumıniya, Macarıstan, İspaniya, İtaliya, Bolqarıstan, Sloveniya, Latviya, Litva, Polşa və Finlandiyada da sərhəd nəzarəti və sərhədlərin qorunması üzrə tapşırıqları yerinə yetirirdi.
Asiman Əsədov
AZƏRTAC-ın xüsusi müxbiri
Riqa
Bölmənin digər xəbərləri
