FEDERAL KANSLER GERHARD ŞRÖDER İRAQIN GƏLƏCƏYİ HAQQINDA BƏYANATLA ÇIXIŞ ETMİŞDİR
Almaniyanın federal kansleri Gerhard Şröder Bundestaqda hökumət bəyanatı ilə çıxış edərək, müharibədən sonrakı İraqda dövlətçiliyin strukturunu müəyyənləşdirən dörd meyarın vacibliyini vurğulamışdır: ölkənin ərazi bütövlüyü və siyasi suverenliyi tamamilə təmin olunmalı; İraq xalqına siyasi gələcəyini yalnız özünün müəyyənləşdirməsi imkanı yaradılmalı; ölkənin neft və digər təbii ehtiyatları İraq xalqına məxsus olaraq onun nəzarəti altında saxlanmalı; Yaxın və Orta Şərqdə sülhün və sabitliyin bərqərar olunması işi Avropa Birliyi, ABŞ, Rusiya və BMT-dən ibarət “Yaxın Şərq dördlüyü”nün sülhməramlı planına əsasən həyata keçirilməlidir.
Federal kanslerin fikrincə, gələcək İraq dövlətinin təhlükəsizliyinin təmin edilməsi modeli BMT-nin ümumi və hərtərəfli sabitlik yaratmaq prinsiplərinə söykənməlidir. O, təəssüflə demişdir ki, Birləşmiş Ştatlar BMT-nin münaqişələrin aradan qaldırılması və sülhün bərqərar olunması işində əl atılmalı son hədd və çıxış yolu hesab etdiyi güc tətbiqi prinsipinə üstünlük verərək, müharibəni öz xeyrinə aparır və İraqın gələcək siyasi dövlətçilik strukturunu müəyyənləşdirmək məqsədi ilə orada “Yaxın Şərq dördlüyü”nün sülhməramlı prinsiplərinin əksinə olaraq, NATO-nun mühafizə qoşunlarını yerləşdirməyi planlaşdırır.
Gerhard Şröder İraq münaqişəsindən ibrət dərsi almaqla, Avropa Birliyini tez bir zamanda üzv dövlətlərin yeni “Təhlükəsizlik və Özünümüdafiə Birliyi”nə - münaqişələrin qarşısının alınması və sülhün təmin edilməsi yolunda Avropanın cavabdehliyinə və səylərinə dəstək olacaq quruma çevirməyi tələb etmişdir. Federal kanslerin fikrincə, bu, dünyanın, o cümlədən qitənin təhlükəsizliyi probleminə ümumdünya və ümumavropa miqyası verə biləcək bir birlik ola bilər.
Yusif Xəlilov
AZƏRTAC-ın xüsusi müxbiri
Berlin
Bölmənin digər xəbərləri
