Fehmi Ərdoğan: Ermənilərin təxribatları onların indiyədək Qarabağda törətdiyi ağır cinayətlərdən biridir
İstanbul, 4 avqust (AZƏRTAC). Xəbər verdiyimiz kimi, Ermənistan silahlı qüvvələrinin son günlər Ermənistan-Azərbaycan dövlət sərhədi və qoşunların təmas xəttinin müxtəlif istiqamətlərində atəşkəs rejimini pozaraq Silahlı Qüvvələrimizin mövqelərinə basqın etmələri Türkiyədə böyük etirazlara səbəb olub.
Tanınmış türk şairi Fehmi Ərdoğan AZƏRTAC-a müsahibəsində bildirib ki, ermənilərin təxribatları onların indiyədək Qarabağda törətdiyi ağır cinayətlərdən biridir.
“Haqdan, ədalətdən, hüquq bərabərliyindən danışan dünya birliyinin ayrı-ayrı təmsilçiləri öz torpaqlarının, doğma yurdlarının iyirmi ildən çox bir müddətdə hərbi döyüş meydanına çevrilməsinə razı olarlarmı? Qarabağ Tanrının Azərbaycan xalqına bəxş etdiyi gözəl bir məkandır. Bu torpağa təcavüz gözəlliyə, şeirə, sənətə, musiqiyə, insanlığa təcavüzdür. Beynəlxalq ictimaiyyət dərk etməlidir ki, dünyada sülhün və sabitliyin bərpası Dağlıq Qarabağda Azərbaycan xalqına qarşı illərdən bəri davam edən haqsızlığın aradan qaldırılmasından keçir”, - deyə o vurğulayıb.
Sabir Şahtaxtı,
AZƏRTAC-ın xüsusi müxbiri
İstanbul
Bölmənin digər xəbərləri
