Filippin Prezidenti faydalı qazıntılarla bağlı müqavilələrə tətbiq edilən moratoriumu aradan qaldırıb
Tokio, 15 aprel, AZƏRTAC
Filippin Prezidenti Rodriqo Duterte ölkədə faydalı qazıntılarla bağlı imzalanan yeni müqavilələrə tətbiq edilən moratoriumu aradan qaldırıb.
AZƏRTAC xəbər verir ki, bu barədə Filippin liderinin dövlət gəlirlərinin artırılması barədə sərəncamında qeyd edilib.
Bildirilib ki, yeni sərəncam hakimiyyət orqanlarına 1995-ci ildə qəbul edilmiş faydalı qazıntıların çıxarılması barədə qanun və digər qaydalar gözlənilməklə yeni müqavilələr imzalamaq icazəsi verir. Sənəddə Ətraf Mühit və Təbii Ehtiyatlar Nazirliyinə geoloji-kəşfiyyat işlərinin aparılması üçün icazə verilməsi səlahiyyətinin bərpa olunduğu qeyd edilib. Nazirlik, həmçinin mövcud müqavilələrdəki və razılaşmalardakı şərtləri yenidən yoxlamaq hüququna da malik olacaq.
Xatırladaq ki, 2012-ci ildə Filippin Prezidenti Beniqno Akino mühafizə edilən, kənd təsərrüfatı, turizm və digər vacib ərazilərdə faydalı qazıntıların çıxarılması barədə müraciətlərin qəbulunu dayandıran sərəncam imzalamışdı.
Yeni sənəddə bildirilir ki, Filippin bu günədək özünün faydalı qazıntılarının 5 faizdən azını mənimsəyib.
Qeyd edək ki, bu respublika İndoneziyadan sonra Çinə paslanmayan polad istehsalında istifadə edilən nikel filizinin ikinci ixracatçısıdır.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
