Bakı, 6 avqust, AZƏRTAC

Parisdə keçirilən Olimpiya Oyunlarında qızıl medallar qazanan filippinli gimnast Karlos Yulonun qələbəsi idmançının həmvətənləri tərəfindən geniş şəkildə bayram edilib. AZƏRTAC xarici mediaya istinadla xəbər verir ki, iş adamları gimnastı puldan və yeni mənzildən tutmuş ömürlük makaron və pendirə qədər hədiyyələrlə mükafatlandırırlar.

Filippin Prezidenti Ferdinand Markos bildirib ki, Yulo 2020-ci ildə ağır atlet Hidilin Diazdan sonra idman gimnastikası üzrə döşəmə hərəkətində Olimpiya qızıl medalını qazanan ilk filippinli və Olimpiya qızılını qazanan ikinci yerli idmançı kimi tarixdə qalacaq. Bazar günü, avqustun 4-də Yulo tullanma üzrə yarışda yenidən podiumun zirvəsinə qalxaraq, eyni Olimpiadada iki qızıl medal qazanan ilk filippinli olub. Prezident bununla bağlı bildirib: “Sizinlə necə qürur duyduğumu ifadə etmək üçün söz tapa bilmirəm. Dünyanın hər yerində olan filippinlilər sizin arxanızda toplaşıblar”.

Yulo 6 milyon Filippin pesosu (100 000 dollardan bir qədər çox) və Konqres medalı, həmçinin İdmançıların Təşviqi Qanununa əsasən 10 milyon peso (təxminən 172 000 dollar) alacaq.

Özəl şirkətlər idmançıya çoxlu hədiyyələr, o cümlədən 32 milyon peso (552 min dollar) dəyərində tam təchiz olunmuş üçotaqlı mənzil hədiyyə ediblər. Bir restoranlar şəbəkəsi də idmançıya ömürlük pulsuz bufet vəd edib.

Avtomobil fənərləri üzrə mütəxəssis ona avtomobili üçün pulsuz fənər dəsti təklif edib, toy fotoqrafı 24 yaşlı gəncə pulsuz xidmət göstərəcəyini bildirib və başqa bir iş adamı ona ömürlük telefon qutuları verəcək. Filippinli həkimlərdən biri 45 yaşı tamam olanadək Yuloya, eləcə də onun dəstəkləmək istədiyi ehtiyacı olan xəstələrə pulsuz məsləhətlər və endoskopik prosedurlar vəd edib.

İdmançı deyib: “Biz çox kiçik ölkəyik... Ona görə də qızıl medal bizim üçün çox vacibdir”. Mükafatlandırma mərasimi zamanı idmançı göz yaşları içində bildirib: “Bu qələbələri mənə dəstək olan Filippin xalqına həsr edirəm”.