Florida sahillərinə yaxınlaşmaqda olan “Elza” fırtınası qasırğaya çevrilib
Bakı, 7 iyul, AZƏRTAC
“Elza” tropik fırtınası qasırğa səviyyəsinə keçərək Florida ştatının şimal sahillərinə yaxınlaşır.
AZƏRTAC Amerika KİV-lərinə istinadla xəbər verir ki, bu barədə ABŞ-ın Qasırğalara Nəzarət üzrə Milli Mərkəzi məlumat yayıb.
“Elza” fırtınası iyulun 6-da yerli vaxtla saat 20:00-da Florida ştatının Tampa şəhərindən təxminən 165 kilometr cənub-qərbdə idi. Hazırda şimala doğru irəliləyən qasırğanın mərkəzində küləyin sürəti saatda 120 kilometrə çatır.
Floridanın qubernatoru Ron Desantis qasırğanın bu gün yerli vaxtla səhər saat 8:00-dan 9:00-dək (Bakı vaxtı ilə 16:00-17:00) Tampa Körfəzinə çatacağını deyib. Bu səbəbdən ştatın 15 dairəsində fövqəladə vəziyyət rejimi tətbiq olunub.
“Elza” iyunun 24-də Serfsayd şəhərində çökən binanın dağıntılarının yığışdırılması və axtarış-xilasetmə işlərinə mane ola bilər. İyulun 6-na olan məlumata əsasən, faciə nəticəsində 36 nəfərin öldüyü barədə məlumat təsdiqlənib, 109 nəfər isə hələ də itkin düşmüş sayılır.
Qeyd edək ki, bundan öncə “Elza” fırtınası Karib regionunda yerləşən ada dövlətlərini cənginə almışdı. Təbii fəlakət Sent Lüsiya, Dominikan Respublikası, Barbados, Haiti və Kubada azı üç nəfərin ölümünə səbəb olub, həmçinin evlərə və elektrik xətlərinə ciddi zərər vurub.
Bölmənin digər xəbərləri
