“Ford” elektromobil strategiyasını kəskin dəyişir
Bakı, 16 dekabr, AZƏRTAC
ABŞ-ın “Ford” şirkəti bir neçə elektromobil modelinin istehsalını dayandırır və bu layihələrə xərclədiyi 19,5 milyard dolları rəsmi olaraq zərər kimi silir.
AZƏRTAC xəbər verir ki, “Der Spiegel” nəşrinin məlumatına görə, “Ford” bundan sonra aşağıgəlirli iri elektromobillərə investisiya yatırmaq əvəzinə daha yüksək gəlir vəd edən istiqamətlərə, daxiliyanma mühərrikli və hibrid modellərə üstünlük verəcək. Şirkətin yeni siyasəti nəticəsində qısa müddət ərzində Kentukki ştatındakı akkumulyator zavodunda ixtisarlar gözlənilsə də, uzunmüddətli perspektivdə benzin və hibrid modellərinin istehsalı üzrə minlərlə yeni iş yeri açılacaq. “Ford” bunun sayəsində 2025-ci il üçün əməliyyat mənfəəti proqnozunu təxminən 7 milyard dollara yüksəldib.
Şirkətin bu qərarı ABŞ-da elektromobillərə tələbatın zəifləməsi və dövlət dəstəyinin azalması fonunda avtomobil sənayesində müşahidə olunan ümumi tendensiyanı əks etdirir.
Bölmənin digər xəbərləri
