Fövqəladə Hallar Nazirliyi əməkdaşlarının vaksinasiyası əvvəlcədən müəyyənləşdirilmiş qrafiklə növbəli şəkildə aparılır
Bakı, 3 mart, AZƏRTAC
Azərbaycan Respublikası Fövqəladə Hallar Nazirliyi (FHN) əməkdaşlarının koronavirus infeksiyasına qarşı vaksinasiyası nazirliyin Tibb Mərkəzində həyata keçirilir. Əməkdaşlar əvvəlcə müvafiq qaydada həkim müayinəsindən keçirilir, vaksin vurulduqdan sonra isə 30 dəqiqə ərzində həkim nəzarəti altında saxlanılırlar. Peyvənd edilmiş əməkdaşların heç birinin səhhətində indiyədək hər hansı dəyişiklik müşahidə olunmayıb.
AZƏRTAC xəbər verir ki, bunu FHN-in Tibb Mərkəzinin rəis müavini Vəfa Dadaşova martın 3-də nazirlik əməkdaşlarının növbəti vaksinasiyası zamanı jurnalistlərə müsahibəsində deyib.
V.Dadaşova bildirib ki, nazirlik əməkdaşlarının fevralın 25-də başlayan vaksinasiyası nəticəsində artıq 300-dən çox əməkdaş peyvənd olunub. Vaksinasiya könüllü şəkildə həyata keçirilir. Ən müasir tibbi avadanlıqla təmin edilən Tibb Mərkəzində peyvəndləmə əvvəlcədən müəyyənləşdirilmiş qrafiklə növbəli şəkildə aparılır.
Bölmənin digər xəbərləri
