AZƏRTAC “Novosti” agentliyinə istinadla xəbər verir ki, Fransanın sualtı arxeoloqları İsgəndəriyyə sahillərində dünyanın yeddinci möcüzəsinin – Faros mayakının özülünü tapmışlar. İsgəndəriyyyə Milli Muzeyinin baş direktoru İbrahim Dərviş jurnalistlərə bildirmişdir ki, eramızın XI və XIV əsrlərində baş vermiş iki zəlzələnin dağıtdığı mayak Şərq buxtasından şimalda 800 kvadratmetr sahədə yerləşirmiş. Biri digərinin üstündə tikilən və getdikcə kiçilən üç qüllədən ibarət Faros mayakının hündürlüyü müxtəlif məlumatlara görə, 120-137 metrə çatırdı. Onun təpəsində közərən kömürlü tunc piyalə və közərən kömürün işiğını onlarca kilometr məsafədən görməyə imkan verən mürəkkəb güzgülər sistemi varmış.
Faros adasının şərqində və İsgəndəriyyə limanının girəcəyində yerləşən mayakı filadelfiyalı II Ptolomeyin (eramızdan əvvəl 284-246-cı illər) əmri ilə memar Zostrat tikmişdir. Zəlzələlər mayakın daş bloklarını bütün liman boyu səpələmiş və arxeoloqlar yalnız indi onun dəqiq yerini müəyyənləşdirmişlər.
İsgəndəriyyə valisi qubernatoru Salam Məhqub bu ilin iyulunda Misir təşkilatlarını və beynəlxalq təşkilatları mayakı bərpa etməyə çağırmışdır. Bərpa işləri 100 milyon dollar vəsait tələb edir.
