Fransa-Ermənistan hərbi əməkdaşlığı işğalçılıq siyasətinin növbəti təzahürdür
Bakı, 14 oktyabr, AZƏRTAC
Prezident, Müzəffər Ali Baş Komandan İlham Əliyevin rəhbərliyi ilə yenilməz Ordumuzun Ermənistan üzərindəki tarixi Qələbəsi anti-Azərbaycan, ermənipərəst qüvvələri, xüsusilə işğalçılıqda Ermənistandan heç də geri qalmayan Fransa kimi siyasi riyakar dövlətləri ciddi narahat edib. Axı 30 illik müstəqillik dövründə bütün sahələr üzrə Azərbaycan kimi sürətlə inkişaf edən və dünyanın 50 güclü orduya malik olan ikinci dövlət olmayıb. Məhz bu uğurlar qərəzli və böhtançı təşkilatları, o cümlədən Fransa kimi özündənrazı dövlətləri qane edə bilməzdi. Ona görə də Fransa ölkəmizi zəiflətmək, haqqımızda beynəlxalq aləmdə mənfi imic yaratmaq üçün daim işğalçı Ermənistanın yanında olub, ədalətsiz mövqe nümayiş etdirib. Bununla, həm də erməni diasporunun əlində oyuncağa çevrildiyini təsdiqləyib. Belə bir el məsəlini də xatırlatmaq yerinə düşərdi: “Atı atın yanına bağlasan, həmxasiyyət olmasa da, həmrəng olacaqlar”. Axı Ermənistan kimi, Fransa da işğalçı dövlət olaraq tanınıb.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O, üç 3 il əvvəl baş vermiş Vətən müharibəsini xatırladaraq deyib ki, Ermənistan Azərbaycana qarşı müharibəyə başlayanda da Fransa beynəlxalq hüquq normalarına hörmətsizlik edərək işğalçı ölkəni müdafiə etdi. Halbuki həmin vaxt Azərbaycanın ərazisi beynəlxalq səviyyədə tanınırdı və dünyanın nüfuzlu təşkilatları Ermənistanın Azərbaycanın ərazisinin 20 faizini işğal etməsi barədə qətnamələr qəbul etmişdi. Fransa özü BMT-nin üzvü olduğu halda, bu qurumun qəbul etdiyi qətnamələrə hörmətsizlik nümayiş etdirdi. Artıq Azərbaycan Ermənistanın işğalına öz gücü ilə son qoyub. Təəccüblüdür ki, Ermənistanın özü, Qarabağın da daxil olduğu Azərbaycanın ərazi bütövlüyünü tanısa da, Fransa hələ də özünə gələ bilmir və bu etirafı qəbul etmək istəmir.
Ə.Bədəlov deyib ki, hazırda Cənubu Qafqazda yeni reallıqlar yaranıb. Ermənistanla Azərbaycan arasında sülh müqaviləsinin imzalanması üçün mühüm addımların atıldığı bir vaxtda Fransa yenidən ara qarışdırmaqla məşğuldur. Məlum olduğu kimi, Paris və İrəvan hərbi əməkdaşlığa başlayıb. Artıq Fransanın bir qrup hərbi kontingenti İrəvandadır. Həmin qrup “HOPE-2023” təlimində iştirak edəcək. Bu da Fransanın Cənubi Qafqazda sabitliyi pozmaq üçün növbəti fitnəkarlığıdır. Hərbi kontingent 56 əsgər, 2 xilasedici it, bir mobil idarəetmə stansiyası və 8 ton avadanlıqdan ibarətdir. Fransanın hərbi heyəti, guya, ölkə təhlükəsizliyi təlimində iştirak üçün gəlsə də, ümumilikdə rəsmi Parisin İrəvanla hərbi əməkdaşlığı diqqət çəkir. Əslində, Fransa öz hərbçilərini ötən ilin oktyabrında Ermənistana göndərib.
Siyasi şərhçi vurğulayıb ki, Ermənistanın ABŞ ilə hərbi təlimlər keçirməsi, KTMT təlimlərindən imtina etməsi və ardınca Fransa ilə birgə hərbi əməkdaşlığı artırması ondan xəbər verir ki, İrəvan Rusiyanın mənsub olduğu hərbi blokda təmsil olunmaq istəmir. Parisin İrəvana silah tədarükü Cənubi Qafqazda gərginliyin artmasına səbəb olub. Məlum olduğu kimi, Ermənistan silahlı qüvvələrinin silah-sursatının əsasını sovetdən qalma köhnə avadanlıqlar və Rusiya istehsalı təşkil edir. Görünür, bu, Fransanı ciddi narahat edib və öz silahlarını Ermənistana ötürmək istəyir. Bunun təhlükəsizliyin təmin olunmasına və sülhə doğru gedən yola heç bir aidiyyəti yoxdur. Əksinə, bu, işğalçının işğalçıya dəstəyi kimi dəyərləndirilməlidir. Bu silahlandırma bölgədə gərginliyi daha da artıracaq.
Ə.Bədəlov qeyd edib ki, Ermənistanın KTMT-dən çıxmaqda məqsədi ərazisində Fransanın hərbi kontingentini yerləşdirməkdir. Bir qədər əvvəl Fransa Ermənistana təhlükəsizliyini təmin etmək üçün bu ölkəni hərbi texnika ilə təmin etməyə razılıq vermişdi. Təbii ki, Ermənistanın bu yolla Rusiyanın asılılığından birdəfəlik azad olub Qərbə arxayın olması yanlış siyasətdir. İstənilən halda Ermənistanın Fransa ilə hərbi əməkdaşlığı atarsa, bu, işğalçı ölkənin bu dəfə Fransanın müstəmləkəsi olmaq anlamına gətirib çıxara bilər.
Siyasi şərhçi Paris-İrəvan hərbi təlimlərinin keçirilmə vaxtının hələ dəqiqləşdirilmədiyini bildirərək deyib: “Ancaq iştirakçıların adları məlumdur. Təlimlərdə Ermənistanla yanaşı, Gürcüstan, Kipr, Yunanıstan, Fransa, Monteneqro və Şimali Makedoniyadan olan xilasedicilərin iştirakı nəzərdə tutulub. Fransa adı çəkilən ölkələri də ətrafına cəlb etməklə bölgədə əzələ nümayiş etdirmək istəyir. Ancaq unudur ki, Azərbaycan Silahlı Qüvvələri dünyanın 50 ən güclü ordusu sırasındadır və bu ordu qarşısına qoyduğu məqsədlərə nail olur. Vətən müharibəsindəki tarixi Qələbə və lokal xarakterli antiterror tədbirləri də bunu təsdiqlədi. Fransa və Ermənistanın hərbi əməkdaşlığı işğalçılıq siyasətinin növbəti təzahürdür: “Ancaq Ermənistan belə fitnələrə uymamalı, sülh müqaviləsinin imzalanması barədə düşünməlidir. Fransa kimi siyasi riyakar dövlətin bölgədə ara qarışdırmaq cəhdi heç bir nəticə verməyəcək. Çünki Ermənistan Azərbaycan Ordusunun gücünə bələddir”.
Bölmənin digər xəbərləri
