Fransa Prezidentinin məqsədi Ermənistana dayaq duraraq sülh müqaviləsinin imzalanmasına mane olmaqdır
Bakı, 18 fevral, AZƏRTAC
Münxen Təhlükəsizlik Konfransı (MTK) dünya nizamında təhlükəsizlik məsələlərinin və qlobal siyasi proseslərin çıxış yollarının müzakirəsi baxımından çox vacib platformadır. Təhlükəsizlik məsələləri təkcə siyasi məna daşımır. Bu gün həm də iqtisadi bağlantıların və təchizatların təhlükəsizliyinin təmini məsələləri hər zaman olduğundan daha vacibdir. Çünki Rusiya-Ukrayna müharibəsi dünyanın iqtisadi bağlantılarına, təchizat mənbələrinə və marşrutlarına yenidən baxılmasını zəruri edib. Bu baxımdan Rusiyaya tətbiq olunmuş sanksiyalar fonunda Asiya ilə Avropa arasındakı ənənəvi iqtisadi bağlantılarda çətinliklər yaranıb, yeni dəhlizlərin istifadəyə verilməsi daha da aktuallaşıb.
Bu fikirləri AZƏRTAC-a açıqlmasında Milli Məclisin deputatı Azər Badamov söyləyib.
O deyib: “Prezident İlham Əliyevin uzaqgörən siyasəti nəticəsində zamanında icra olunmuş nəqliyyat və enerji dəhlizləri Asiya ilə Avropa arasında ticari-iqtisadi əlaqələrinin davam etdirilməsində ölkəmizi vacib marşruta çevirib. O cümlədən Bakı Beynəlxalq Ticarət Limanı və Bakı-Tbilisi-Qars (BTQ) dəmir yolu Orta Dəhlizin tərkib hissəsi olaraq bu dəhlizin yükgötürmə potensialının artırılması məsələlərini daha da aktuallaşdırıb. Bundan əlavə, Azərbaycanın Avropanın enerji təhlükəsizliyində alternativsiz mənbəyə çevrilməsi ölkəmizin əhəmiyyətini daha da artırıb. Avropa Komissiyasının Prezidenti xanım Ursula Fon der Lyayen ilə Bakıda imzalanmış enerji sahəsində Strateji Tərəfdaşlığa dair Anlaşma Memorandumuna əsasən Azərbaycan 2027-ci ilə qədər TAP vasitəsilə təbii qazın ixracını 20 milyard kubmetrə, TANAP-la isə 32 milyard kubmetrə çatdırılmasını planlaşdırır. O cümlədən bərpaolunan enerjinin istehsalı və ixracı istiqamətində razılaşdırılmış layihələr Azərbaycanı Avropa üçün vacib partnyora çevirib”.
Deputat qeyd edib ki, fevralın 17-də başlayan 59-cu Münxen Təhlükəsizlik Konfransına Prezident İlham Əliyev ən vacib tərəfdaş və dünya gündəmini müəyyənləşdirən, düşüncələrini bölüşən mahir natiq kimi dəvət olunub. Dövlətimizin başçısının iştirak etdiyi enerji təhlükəsizliyi ilə bağlı dəyirmi masada səsləndirdiyi fikirlər dünya ictimaiyyəti tərəfindən çox maraqla izlənildi. O cümlədən Cənubi Qafqazda təhlükəsizliyin qurulmasına dair keçiriləcək panel iclası da çox maraqla gözlənilir. Prezident İlham Əliyevin bu panel iclasda da səsləndirəcəyi fikirlər yeni dünya nizamının yaranmasına töhfə verəcək.
Çox təəssüf ki, MTK beynəlxalq sülhə və təhlükəsizliyə xidmət etdiyi halda, Fransa Prezidenti Emmanuel Makronun “Fransa dünyada” adlı tədbirdə səsləndirdiyi absurd fikirlər bu konfransın mahiyyətinə böyük zərbə vurdu. Belə ki, E.Makronun çıxışında əks etdirdiyi birtərəfli yanaşmalar dünyada sülhün və təhlükəsizliyin yaranmasında Fransanın əngəl olduğunu nümayiş etdirdi. Fransa Prezidenti BMT TŞ-nin üzvlük formatından narazılıq etməklə qurumun “more inclusive” olmalıdır tezisini səsləndirdi. Onun bu çıxışları, eyni zamanda, Rusiyanı BMT TŞ-nin daimi üzvlüyündən uzaqlaşdırmaq məqsədi güdürdü. Həmçinin bu təşkilatda Fransanın təsir gücünü artırmaq istəyi də əsas istəklərdəndir. E.Makron yeni dünya nizamının təkcə Qərbin maraqlarına xidmət etməsini, bundan əlavə, Rusiyanın təsir gücünü aradan qaldırmaqla özlərinin imperialist maraqlarını sərbəst həyata keçirə bilmələrini istəyir.
“E.Makron Cənubi Qafqazın problemləri ilə bağlı səsləndirdiyi fikirlərində də Rusiyanın regionumuzda sülh yaradacağına inanmadığını bildirərək N.Paşinyanın yanında dayanmağa davam edəcəyini qeyd etdi. Fransa Prezidentinin N.Paşinyanın yanında olmağa davam etməsi və gərək avtokratik rejimlərlə işləyək deməsi Cənubi Qafqazda sülhün və təhlükəsizliyin təmin olunmasına böyük təhdiddir. Çünki Fransa Cənubi Qafqazda sülhü istəsəydi, öz bacısının yanında olmağa davam edəcəyini yox, neytral mövqe sərgiləyəcəyini bəyan etməli idi. Məhz ona görə də E.Makronun müəllifi olduğu Avropa İttifaqının monitorinq missiyası Ermənistana uzunmüddətli dövr üçün gəlir. Fransa Prezidentinin məqsədi Ermənistana dayaq duraraq sülh müqaviləsinin imzalanmasına mane olmaqdır. Təbii ki, onun bu yanaşması yeni dünya nizamının formalaşmasına və təhlükəsizliyinin yaranmasına böyük maneədir.
Tarixə nəzər salsaq, Fransanın müstəmləkəçi ölkə olduğunu görərik. Ona görə də Fransa kiçik ölkələrə də bu gözlə baxır. Amma E.Makron unudur ki, dünya dəyişilib və Azərbaycan ləyaqətli müstəqil ölkə kimi öz haqqını müdafiə etməyə qadirdir və dünya birliyi ancaq Fransadan ibarət deyil. 2022-ci ildə E.Makronun BMT TŞ-da Azərbaycana qarşı qəbul etdirmək istədiyi qətnamələrin iflasa uğraması və onun bu mətni rəzilcəsinə gündəlikdən çıxartması dünya birliyinin 5-dən böyük olduğunu və Azərbaycanın dünya birliyində ləyaqətli tərəfdaş olduğunu sübut etdi. E.Makron rəhbərliyi ilə Fransanın dünya nizamındakı nüfuzunu günü-gündən aşağı salır. Həmçinin Fransanın ədalətsiz ölkə obrazını nümayiş etdirməyə davam edir”, - deyə Azər Badamov vurğulayıb.
Bölmənin digər xəbərləri
