Fransa Rusiyanın informasiya məkanında ikinci əsas hədəfidir
Paris, 4 iyun, AZƏRTAC
Fransa hakimiyyəti hesab edir ki, ölkə Ukraynadan sonra Rusiyanın informasiya sahəsində ən çox hədəfə aldığı dövlətlərdən biridir.
AZƏRTAC xəbər verir ki, bu barədə Fransanın Xarici İşlər Nazirliyinin sözçüsü Paskal Konfavrö açıqlama verib. O, “Radio Classique” radiosuna müsahibəsində bildirib ki, Fransa Ukraynaya verdiyi siyasi və diplomatik dəstəyə görə Moskvanın informasiya kampaniyalarının əsas hədəflərindən birinə çevrilib. “Rusiya, ilk növbədə, Ukraynanı, ikinci növbədə isə Fransanı hədəf alır. Ukraynaya dəstək mövqeyimiz səbəbindən informasiya məkanında Rusiyanın ikinci əsas hədəfi olduğumuzu düşünürük”, - deyə Konfavrö deyib.
Fransalı diplomatın sözlərinə görə, Avropa müxtəlif istiqamətlərdən informasiya və təsir əməliyyatları ilə qarşılaşır. O hesab edir ki, bunun səbəblərindən biri qitənin iqtisadi və sosial cəhətdən cəlbedici olmasıdır.
Konfavrö Avropada yoxsulluq səviyyəsinin nisbətən aşağı, orta ömür uzunluğunun yüksək olduğunu və hazırda Avropa Birliyinə üzv olmaq istəyən on ölkənin mövcudluğunu xatırladaraq qeyd edib ki, bu amillər qitənin cazibəsini artırır. “Bu cazibə gücünü və məhz buna görə hədəfə çevrildiyimizi kiçiltmək olmaz”, - deyə Fransa Xarici İşlər Nazirliyinin sözçüsü vurğulayıb.
O hesab edir ki, Avropa ölkələrinə qarşı aparılan informasiya əməliyyatları yalnız geosiyasi rəqabətlə deyil, həm də onların beynəlxalq arenadakı mövqeləri ilə bağlıdır. Onun fikrincə, xüsusilə Ukraynaya dəstək verən dövlətlər daha çox informasiya təzyiqinə məruz qalırlar.
Bu bəyanatlar Rusiyanın Ukraynaya qarşı müharibəsi fonunda Paris və Moskva arasında münasibətlərin gərgin olaraq qaldığı bir dövrdə səsləndirilib.
Son günlərdə tərəflər arasında yeni diplomatik mübahisə də yaranıb. Rusiya Fransa tərəfindən açıq dənizdə Rusiyaya məxsus “Tagor” gəmisinin saxlanılmasına etiraz edib.
Ekspertlərin fikrincə, Ukrayna müharibəsinin davam etdiyi şəraitdə informasiya məkanı dövlətlər arasında rəqabətin əsas cəbhələrindən birinə çevrilib. Fransa rəsmilərinin son açıqlamaları da göstərir ki, Paris informasiya təhlükəsizliyi məsələsini milli təhlükəsizlik strategiyasının mühüm istiqamətlərindən biri hesab edir və bu sahədə təhdidlərin yaxın illərdə də davam edəcəyini gözləyir.
Bölmənin digər xəbərləri
