FRANSA TELEKANALINDA AZƏRBAYCANA HƏSR OLUNMUŞ FİLM GÖSTƏRİLMİŞDİR
Tanınmış fransız kinosənətçisi Bertran Olimiyenin filmində Azərbaycanla tanışlığa Şəkidən başlanır. Filmdə vətənimizin bu dilbər guşəsinin zəngin tarixi və mədəniyyət abidələrindən söhbət açılmış, məşhur Şəki ipəyinin dünya bazarlarına çıxarılmasından, dulusçuluq və miskərlik ənənələrindən danışılmışdır. Azərbaycanın flora və faunası barədə də məlumat verilmişdir.
Müəllif Şəkidən ölkəmizin paytaxtına yola düşmüş, Abşeron yarımadasına xüsusi yer ayırmışdır. İlantutanlarla birlikdə zəhərli gürzə ovunda iştirak etmiş Bertran Oliviye bu peşənin çətinliyini və zəhərli ilanların ovlanma üsullarını göstərmişdir.
Fransız tamaşaçıları Bakının görməli yerləri, qədim İçərişəhərlə tanış olmuşlar. Onlara paytaxt sakinlərinin asudə vaxtlarını necə keçirməsi, musiqi və rəqslərimiz barədə ətraflı məlumat verilmişdir.
Azərbaycan iqtisadiyyatının inkişafında Xəzər neftinin rolu, balıqçılıq təsərrüfatının inkişafı və qara kürü istehsalı fransız səyahətçisində maraq doğurmişdur.
Ölkəmizdə neft sənayesinin XIX əsrin sonlarından sürətlə inkişaf etdiyini xatırladan müəllif əfsanəvi Neft daşlarına xüsusi yer ayırmışdır. Səyahətçi Cənubi Qafqaz ölkələri arasında güclü iqtisadi potensiala malik Azərbaycanın istər regionda, istərsə də dünyada imicinin ilbəil artmasını fransız tamaşaçılarının diqqətinə çatdırmışdır.
