Fransa və Estoniya arasında müdafiə sahəsində əməkdaşlıq genişləndirilir
Paris, 18 iyun, AZƏRTAC
Fransa və Estoniya müdafiə və təhlükəsizlik sahəsində əməkdaşlığın genişləndirilməsinə dair yeni bəyannamə imzalayıb.
AZƏRTAC xəbər verir ki, sənəd Fransanın silahlı qüvvələr və veteranlar naziri Ketrin Votren və Estoniyanın müdafiə naziri Hanno Pevkur tərəfindən imzalanıb.
Birgə bəyanatda tərəflər NATO-nun Avropada kollektiv müdafiənin əsas dayağı olaraq qaldığını vurğulayıb, eyni zamanda, Avropa ölkələrinin hərbi imkanlarının və müttəfiqlər arasında əməkdaşlığın gücləndirilməsinin vacibliyini qeyd ediblər.
Razılaşma quru, dəniz, hava, kiberməkan və kosmos sahələrində əməkdaşlığın dərinləşdirilməsini, həmçinin süni intellekt, pilotsuz uçuş aparatları, radioelektron mübarizə sistemləri və yüksəkdəqiqlikli zərbə texnologiyaları kimi müdafiə innovasiyalarını əhatə edir.
Fransa və Estoniya müdafiə nazirləri və baş qərargah rəisləri arasında müntəzəm strateji dialoqun yaradılacağını, həmçinin qarşılıqlı müdafiə mexanizmi istiqamətində iş aparılacağını açıqlayıblar.
“Rusiya Avropanın təhlükəsizliyi üçün uzunmüddətli təhdiddir”, – deyə Estoniyanın müdafiə naziri Hanno Pevkur bildirib. Onun sözlərinə görə, yeni tərəfdaşlıq NATO-nun şərq cinahının daha da möhkəmləndirilməsi istiqamətində müttəfiqlərin qətiyyətini nümayiş etdirir.
Fransa 2017-ci ildən etibarən Estoniyada NATO qüvvələrinin tərkibində daimi hərbi iştirakını təmin edir. Hər iki ölkənin silahlı qüvvələri Mali və Mərkəzi Afrika Respublikası da daxil olmaqla bir sıra beynəlxalq əməliyyatlarda da birgə fəaliyyət göstərib.
Bölmənin digər xəbərləri
