Fransa XİN İranda saxlanılan iki diplomatın Parisə qayıtdığını bildirib
Bakı, 23 iyul, AZƏRTAC
Fransa xarici işlər naziri Jan-Noel Barro cümə axşamı bildirib ki, İranda “hücuma məruz qalan” iki fransız diplomatı Parisə qayıdıb.
AZƏRTAC xəbər verir ki, nazirin “France Inter” radiosuna bildirdiyinə görə, həmin iki diplomat İranı tərk edib və iyulun 22-də Parisə qayıdıb. Barro qeyd edib ki, onlar İranla bağlı diplomatik missiyalarını sonuna qədər, lakin Parisdən davam etdirəcəklər.
Fransız nazir iddia edib ki, diplomatlar İranın təhlükəsizlik əməkdaşları tərəfindən “özəl bir yerdə vəhşicəsinə həbs edildikdən sonra şoka düşüblər”. Onlar rabitə cihazlarına və ya səfirliyə çıxışı olmadan təxminən dörd saat saxlanılıb və təhdidlərə məruz qalıblar.
Barronun daha bir iddiasına görə, diplomatlardan biri döyülüb, hazırda ona Parisdə psixoloji yardım göstərilir.
Nazir bildirib ki, diplomatlar İranda tələbələr, sənətçilər və alimlər də daxil olmaqla, vətəndaş cəmiyyətini dəstəkləyən proqramlar həyata keçirirdilər. O, həmçinin İranın bu hərəkətinə adekvat cavab veriləcəyini deyib.
Barro Fransanın İranın xarici işlər nazirinə artıq etirazını bildirdiyini və Parisdəki İranın müvəqqəti işlər vəkilini çağırdığını deyib.
Bölmənin digər xəbərləri
