Fransalı hüquqşünas Evian şəhər bələdiyyəsinin qərarını qeyri-legitim adlandırıb
Bakı, 17 yanvar, AZƏRTAC
Evian şəhərində “Azərbaycan bağı”nın adının dəyişdirilməsi qərarının hüquqi əsası yoxdur.
Diasporla İş üzrə Dövlət Komitəsindən AZƏRTAC-a bildiriblər ki, bu fikri Paris Universitetinin müəllimi, beynəlxalq cinayət hüququ üzrə fəlsəfə doktoru Joaquinito Aloqo de Obono bildirib.
Onun sözlərinə görə, Azərbaycanın İsmayıllı şəhəri ilə Fransanın Evian şəhəri arasında imzalanmış Dostluq və Əməkdaşlıq Xartiyasının qüvvədən düşməsi, “Azərbaycan bağı”nın adının dəyişdirilməsi haqqında qərar qarşılıqlı razılıq əsasında qəbul edilməyibsə, bu, legitim sayıla bilməz.
Natəvanın abidəsinin təhqir olunmasının hüquqi məsuliyyət yaratdığını söyləyən fransalı hüquqşünas qeyd edib: “Polis bu vandallığı törədənləri dərhal tapıb, məhkəməyə çıxarmalıdır”.
O xatırladıb ki, artıq Azərbaycanla Ermənistan arasında müharibə yoxdur. “Bütün böyük güclər, o cümlədən Fransa da çalışmalıdır ki, tərəflər bir-birinə yaxınlaşsın, sülh müqaviləsi imzalansın. “Azərbaycan bağı”nı ləğv etməklə, abidəni təhqir etməklə biz bu işə heç bir töhfə verə bilmərik”, - deyə hüquqşünas diqqətə çatdırıb.
Bölmənin digər xəbərləri
