Fransız televiziyasında Xocalı faciəsi ilə bağlı veriliş səslənmişdir
Paris, 24 fevral (AZƏRTAC). Azərbaycanın Fransadakı səfirliyindən AZƏRTAC-a bildirmişlər ki, Fransanın məşhur “France 24” televiziya kanalının Cənubi Qafqaz üzrə müxbiri ötən həftə Azərbaycana səfər etmiş və Xocalı soyqırımı ilə bağlı veriliş hazırlamışdır. Onun hazırladığı reportaj fevralın 24-də nümayiş etdirilmişdir.
Xocalı faciəsinin 20 illiyinə həsr edilmiş reportajda 1992-ci il fevralın 25-dən 26-na keçən gecə ermənilərin Azərbaycanın bu şəhərinə hücum etdikləri, yeli sakinlərə görünməmiş divan tutduqları, qadınlar, uşaqlar və qocalar daxil olmaqla 613 azərbaycanlını qətlə yetirdikləri bildirilmişdir. Verilişdə Xocalıdan olan bir qadının və 10 yaşı olarkən qırğından sağ çıxmış Anar Usubovun bu dəhşətli faciə ilə bağlı xatirələrinə geniş yer verilmiş və erməni vəhşiliyindən bəhs olunmuşdur.
Reportajda Azərbaycan ərazilərinin 20 faizinin ermənilər tərəfindən işğal olunduğu, ölkədə 1 milyondan artıq azərbaycanlının öz torpaqlarında qaçqın və məcbur köçkün kimi yaşadığı qeyd edilmiş, onların ağır həyat şəraitindən, dövlətin bu insanlara göstərdiyi qayğıdan bəhs edən təsvirlər verilmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
