Fransua Bayru və büdcə planı: Reallıqdan uzaq gözləntilər
Paris, 16 iyul, AZƏRTAC
Fransanın Baş naziri Fransua Bayru hökumətin 2026-cı il üçün büdcə planını təqdim edib. O, hökumətin bu büdcə planına böyük ümidlər bəslədiyini açıqlayıb.
AZƏRTAC xəbər verir ki, lakin F.Bayrunun bu mövzuya yanaşması bir çoxlarına real vəziyyəti düzgün qiymətləndirməmək kimi görünüb.
Baş nazir onsuz da dərin iqtisadi və sosial çətinliklərlə üz-üzədir – yüksək inflyasiya, artan işsizlik və dövlət borcu rekord səviyyəyə çatıb. Bunların fonunda Bayrunun “ədalətli və məsuliyyətli büdcə” kimi ümumi və qeyri-müəyyən fikirlərinin sadəcə siyasi ritorikadan başqa bir şey olmadığı deyilir.
Bayru iddia edir ki, büdcə həm qənaətcil olmalı, həm də sosial xidmətlərə investisiyanı artırmalıdır. Amma bu iki məqsədi eyni anda həyata keçirmək, xüsusilə indiki böhran şəraitində, demək olar ki, mümkünsüzdür. Ən narahatedici məqam isə Bayru hökumətinin siyasi zəifliyini və parlamentdə əksəriyyətin olmamasını nəzərə almaması və ciddi təhlil aparmamasıdır.
Bayrunun kompromis və dialoq çağırışları isə artıq reallıqla ayaqlaşmır. Cəmiyyətin geniş təbəqələri narazıdır, etirazlar artır, vətəndaşlar hər gün iqtisadi sıxıntılarla üzləşir. Belə bir şəraitdə sadəcə “birlik və anlayışa” çağırmaq problemin həlli deyil, onun üzərini örtməkdir.
Bölmənin digər xəbərləri
