Futzal millisinin sabiq baş məşqçisi: Yenidən Azərbaycanda işləmək istərdim - MÜSAHİBƏ
Bakı, 18 aprel, AZƏRTAC
Futzal üzrə Azərbaycan millisinin və “Araz-Naxçıvan” komandasının keçmiş baş məşqçisi Joze Alesio AZƏRTAC-a müsahibə verib. Braziliyalı mütəxəssis ölkəmizdəki karyerası və yığma komanda barədə danışıb.
- Azərbaycanda keçirdiyiniz günləri necə xatırlayırsınız?
- Azərbaycanla bağlı çoxlu xoş xatirəm var. Həmişə deyirəm ki, Azərbaycan Braziliyadan sonra ikinci vətənim, mənə qucaq açan ölkədir. Məşqçi karyeram elə oradan başladı. Yaxşı dostlar və həyatımın sonuna kimi özümlə aparacağım nailiyyətlər qazandım. İndi də özümü azərbaycanlı kimi hiss edirəm.
- Ölkəmizdə sizin üçün ən yaddaqalan hadisə nə olub?
- Yaddaqalan hadisələr çoxdur. Amma 2009-cu ildə Avropa çempionatında 4-cü olmağımızı xüsusi qeyd edə bilərəm. Şübhəsiz ki, bu nəticə tarixdə öz izini qoydu. Portuqaliya ilə keçirilmiş oyunun əsas vaxtı 3:3 hesablı heç-heçə ilə başa çatmışdı. Yalnız penaltilər seriyasında məğlub olduq. Finala çıxmaq şansımız var idi. Bu, Azərbaycan futzal tarixində indiyədək yaşanmayan hadisə idi.
- Maraqlıdır, milli komandadakı uğurunuzun sirri nə idi?
- Birinci ildəki bu uğur layihəyə və işimə inanan, çətin anlarımda mənə dəstək olan, yaxşı iş görmək üçün bizə hər zaman şərait yaradan federasiya rəhbərliyindən və futzalçılardan aldığım böyük dəstəklə bağlıdır. Hər zaman komanda idman növündə oyunçuların əhəmiyyətindən danışıram. Futzalçılar nəticələrə və məşqçinin verdiyi tapşırıqlara məsuliyyətlə yanaşmalıdırlar.
- Uzun müddət Azərbaycanda işləmisiniz. Ölkəmiz yaddaşınızda hansı xoş izləri buraxıb?
- On üç il Azərbaycanda işləmişəm. Bakıda özümü evimdəki kimi hiss edirdim. Ailəmə göstərilən qayğıya görə hər zaman minnətdar olacağam.
- Azərbaycanda olan dostlarınızla əlaqə saxlayırsınız?
- İşlərimiz çox olduğundan tez-tez əlaqə saxlamaq olmur. Amma fürsət tapdıqca, danışdığım insanlar var. Ad çəkmək istəmirəm. Çünki onların hamısının adlarını burada yaza bilməyəcəyəm (gülür).
- Hazırda Qazaxıstanda “Ordabası” klubunun baş məşqçisi kimi fəaliyyətinizi davam etdirirsiniz. Qazaxıstan ilə Azərbaycan futzalını necə müqayisə edərdiniz?
- Qazaxıstan futzalı hazırda öndədir. Onların çox rəqabətli çempionatı var. Milli və klub səviyyəsində aşağı yaş qruplarından ibarət komandalar var və buna görə də son vaxtlar gözəl nəticələr əldə edirlər.
- Yenidən Azərbaycana qayıtmaq istərdiniz?
- Nə vaxtsa federasiyadan dəvət olsa, geri qayıtmaq istərdim. Çünki bu, mənim hər zaman məqsədim olub. Arzum Azərbaycan futzalını həmişə ən yüksək yerlərdə görməkdir.
- Hazırda Azərbaycan millisində legionerlər çıxış etmirlər. Millinin nəticələri əvvəlki illərlə müqayisədə elə də yaxşı deyil. Bəziləri bunu heyətdə braziliyalı oyunçuların olmaması ilə əlaqələndirir. Sizin bu məsələyə münasibətiniz necədir?
- Millinin oyunlarını izləyirəm. Bəli, bilirəm ki, artıq braziliyalılar yoxdur. Bu hadisənin nə vaxtsa olacağı gözlənilirdi. Mənə görə, nəticələrin belə olması liqanın zəifləməsi ilə bağlıdır. Klublarda gənc oyunçular çox azdır. Amma inanıram ki, federasiya rəhbərliyinin öz planı var və Azərbaycan futzalını yenidən yüksək yerlərə qaytaracaq.
- Sabiq komandanız “Araz-Naxçıvan” barədə nə deyə bilərsiniz?
- “Araz Naxçıvan” Azərbaycan futzalında böyük tarixə malik ən titullu klubdur. Avropada böyük nailiyyətlər əldə edib. Unutmaq olmaz ki, komanda iki dəfə Çempionlar Liqasında üçüncü yeri tutub.
Bölmənin digər xəbərləri
