GAK sədri: WUF13-ün Bakıda keçirilməsi Azərbaycanın qlobal təşəbbüslərə verdiyi töhfənin növbəti nümunəsidir
Tbilisi, 15 may, AZƏRTAC
Məlumdur ki, yaxın bir neçə gün ərzində Bakıda WUF13 Forumu keçiriləcək. Bununla Azərbaycan dünyanın aparıcı şəhərsalma mütəxəssislərini və beynəlxalq təşkilatların yüksək nümayəndələrini bir araya gətirəcək. Bu tədbir COP29-dan sonra Azərbaycan dövlətinin iqlim və insan resursları ilə bağlı təşkil etdiyi ikinci böyük və qlobal əhəmiyyətli tədbirdir.
Bu sözləri AZƏRTAC-a müsahibəsində Gürcüstan Azərbaycanlıları Konqresinin (GAK) sədri Hüseyin Yusifov söyləyib.
Onun sözlərinə görə, WUF13 Forumu çərçivəsində Bakı şəhəri qlobal urbanizasiya problemlərinin müzakirə olunduğu öncül platformaya çevriləcək.
“Forumda dünyanın 100-dən çox ölkəsindən dövlət və hökumət nümayəndələri, şəhər merləri, alimlər, vətəndaş cəmiyyəti institutlarının üzvləri, eləcə də özəl sektorun təmsilçiləri iştirak edəcək. Tərəflər arasında açıq müzakirələr, tematik sessiyalar, elmi konfranslar və sərgilər keçiriləcək. Ona görə də düşünürəm ki, bu Forum qeyri-qanunverici, inklüziv və açıq platforma olaraq, dünyanın müxtəlif guşələrində baş verən urbanizasiya proseslərini, mənzil problemlərini, şəhərlərin iqlim dəyişikliyi fonunda dayanıqlılığını, infrastrukturun möhkəmləndirilməsini və təhlükəsiz yaşayış məkanlarının təşkili məsələlərini əhatə edəcək”, – deyə GAK sədri bildirib.
Qeyd edib ki, bu qədər mühüm məsələlərin müzakirəsindən sonra dünyanın aparıcı universitetlərinin və beyin mərkəzlərinin tələbə və mütəxəssisləri bu mövzular üzrə elmi məqalələr də yaza bilərlər.
“Bundan başqa, Forumun əsas məqamlarından biri də Azərbaycanın öz milli memarlıq üslubunun təbliğidir. Azərbaycanın özünün yetərincə milli memarlıq və tarixi abidələri var. Bunlar haqqında çox yazılıb. Hesab edirəm ki, Azərbaycanın qədim və zəngin milli memarlıq abidələri dünya üçün maraqlı ola bilər”, – deyə GAK sədri vurğulayıb.
H.Yusifov deyib: “Forumun əsas məqsədləri sırasında davamlı urbanizasiya üzrə maarifləndirmənin artırılması, qabaqcıl təcrübə və siyasətlərin paylaşılması, eləcə də maraqlı tərəflər arasında əməkdaşlığın genişləndirilməsi dayanır. Bu mühüm tədbirin Bakıda keçirilməsi Azərbaycanın qlobal təşəbbüslərə verdiyi töhfənin növbəti nümunəsidir”.
Bölmənin digər xəbərləri
