Gədəbəy şəhərinin su təchizatı və kanalizasiya sistemlərinin yenidən qurulmasına başlanılıb
Bakı, 26 dekabr, AZƏRTAC
“Azərsu” Açıq Səhmdar Cəmiyyəti (ASC) daha bir beynəlxalq maliyyə qurumu ilə su və kanalizasiya layihələrinin icrasına başlayıb.
Azərbaycan Hökumətinin İslam İnkişaf Bankı ilə birgə maliyyələşdirdiyi “Azərbaycanın 6 rayonunda milli su təchizatı və kanalizasiya proqramı layihəsi” çərçivəsində Gədəbəy şəhərinin su təchizatı və kanalizasiya sistemlərinin yenidən qurulması işlərinə başlanılması münasibətilə tədbir keçirilib.
ASC-nin mətbuat xidməti və ictimaiyyətlə əlaqələr şöbəsindən AZƏRTAC-a bildiriblər ki, tədbirdə çıxış edən Gədəbəy Rayon İcra Hakimiyyətinin başçısı Ramiz Yediyarov ölkə rəhbərliyi tərəfindən regionların inkişafına böyük diqqət göstərildiyini bildirib. Diqqətə çatdırıb ki, Prezident İlham Əliyevin diqqət və qayğısı nəticəsində son illər Gədəbəydə böyük inkişaf müşahidə olunur. Rayona yeni yüksək gərginlikli elektrik verilişi, təbii qaz xətləri çəkilir, kəndlərarası avtomobil yolları yenidən qurulur. Növbəti böyük layihələrdən biri su və kanalizasiya sistemlərinin yaradılmasıdır. Bu layihənin uğurlu icrası Gədəbəy şəhərinin və ətraf kəndlərin inkişafına böyük töhfə verəcək.
“Azərsu” ASC-nin “Birləşmiş Su-Kanal” MMC-nin direktoru Etibar Məmmədov qeyd edib ki, regionların sosial-iqtisadi inkişafı Dövlət Proqramına uyğun olaraq bölgələrdə su təchizatı və kanalizasiya infrastrukturu yenidən qurulur. Bu işlər rayon mərkəzləri ilə yanaşı, kənd və qəsəbələri də əhatə edir. Dövlətimizin başçısının respublikanın hər bir şəhər və kəndinin 24 saat fasiləsiz və keyfiyyətli içməli su ilə təmin edilməsi barədə tapşırıqlarına uyğun olaraq bu istiqamətdə genişmiqyaslı işlər həyata keçirilir. Bu gün təməli qoyulan layihəni də nəzərə alsaq, ölkənin 39-cu şəhərində su təchizatı və kanalizasiya sistemlərinin yenidən qurulması layihələri icra olunur. Layihənin keyfiyyətli icrasını təmin etmək üçün yeni texnologiyalardan və avadanlıqlardan istifadə ediləcək. Ümidvaram ki, tikinti işləri qısa müddətdə və keyfiyyətlə icra ediləcək.
İslam İnkişaf Bankının Azərbaycan nümayəndəliyinin rəhbəri Tamerlan Tağıyev təmsil etdiyi maliyyə qurumunun Gədəbəy, Astara, Daşkəsən, Qazax, Samux və Tərtər şəhərlərinin su təchizatı və kanalizasiya infrastrukturlarının yenidən qurulmasına 200 milyon dollar kredit ayırdığını və 2015-ci ildə daha bir neçə şəhərdə işlərə bağlanılacağını diqqətə çatdırıb.
“Gədəbəy şəhərinin su təchizatı və kanalizasiya sistemlərinin yenidən qurulması” layihəsi 2035-ci ilədək perspektiv inkişaf nəzərə alınmaqla Gədəbəy şəhərində 11500 nəfərin içməli su təchizatı və kanalizasiya xidmətlərindən istifadəsinin yaxşılaşdırılmasına hesablanıb. Gələcəkdə rayonun 5 kəndinin (Yenikənd, Düzyurd, Arıqdam, Söyüdlü, Qaradağ) 12 min sakini də bu layihə çərçivəsində içməli su ilə təmin olunacaq. Ümumilikdə layihədən 23 mindən artıq insan faydalanacaq.
İstehlakçıların keyfiyyətli və dayanıqlı su təchizatının təmin edilməsi məqsədilə su mənbəyi Südlübulaq seçilib. Layihəyə uyğun olaraq su mənbəyindən şəhərə 14,8 kilometr uzunluğunda magistral su kəməri çəkiləcək, şəhərin relyef baxımından hündür nöqtələrində ümumi tutumu 5500 kubmetr olan 7 anbar tikiləcək. Şəhər ərazisində 79,4 kilometr uzunluğunda paylayıcı su şəbəkəsi yaradılacaq, 2560 ünvana ev birləşmələri veriləcək və hər bir abonent sayğacla təmin olunacaq.
Layihə çərçivəsində ilk dəfə Gədəbəy şəhərində kanalizasiya şəbəkəsi yaradılacaq. Şəhərdə yaranan tullantı sularının idarə edilməsi üçün 66,2 kilometr uzunluğunda kanalizasiya şəbəkəsi, 1,5 kilometr uzunluğunda kanalizasiya kollektoru, 2050 kanalizasiya quyusu tikiləcək. Şəhərdə yaranacaq tullantı sularının təmizlənməsi üçün məhsuldarlığı sutkada 3500 kubmetr olan çirkab sutəmizləyici qurğu layihələndirilib.
Layihənin icrasının 2016-cı ilin sonunda başa çatdırılması nəzərdə tutulur.
Qeyd edək ki, “Azərbaycanın 6 rayonunda milli su təchizatı və kanalizasiya proqramı layihəsi” çərçivəsində Gədəbəy şəhəri ilə yanaşı, Astara, Daşkəsən, Qazax, Samux və Tərtər şəhərlərinin də su təchizatı və kanalizasiya infrastrukturlarının yenidən qurulması planlaşdırılır.
Bölmənin digər xəbərləri
