Gələn ay su təchizatı infrastrukturunun təkmilləşdirilməsi və genişləndirilməsi layihəsinin icrasına başlanılacaq
Bakı, 30 yanvar, AZƏRTAC
Azərbaycanda fevralın 15-dən etibarən su təchizatı infrastrukturunun təkmilləşdirilməsi və genişləndirilməsi layihəsinin tam icrasına başlanılacaq. ADSEA layihənin həyata keçirilməsi çərçivəsində su şəbəkəsinə qoşulma qaydaları ilə bağlı təqdimat keçirməyi planlaşdırır.
AZƏRTAC xəbər verir ki, bunu Dövlət Su Ehtiyatları Agentliyinin (ADSEA) sədrinin müşaviri Etibar Məmmədov Bakıda keçirilən “Su şəbəkəsinə qoşulma” İşçi qrupunun təqdimatı zamanı bildirib.
Onun sözlərinə görə, iştirakçılar təqdimat zamanı proseslə bağlı suallarını verə biləcək və mövzu geniş müzakirə olunacaq.
“Layihəyə sadəcə müşahidəçi kimi deyil, tam tərəfdaş kimi yanaşmağın vacibliyini vurğulamaq istəyirik. Layihə çərçivəsində müxtəlif dövlət qurumları ilə əməkdaşlıq genişləndirilib və aidiyyəti qurumlar prosesə fəal şəkildə qoşulub. Bəzi çətinliklərə baxmayaraq görülən işlər nəticəsində ciddi irəliləyiş əldə olunub və layihənin icrası tam gücü ilə davam etdiriləcək”, - deyə E.Məmmədov əlavə edib.
Bölmənin digər xəbərləri
