Gender bərabərliyinə həsr edilmiş “Açılış zəngi” keçiriləcək
Bakı, 1 mart, AZƏRTAC
Martın 7-də Bakı Fond Birjasının (BFB) təşkilatçılığı ilə “Gender bərabərliyi üçün Açılış zəngi” tədbiri keçiriləcək.
BFB-dən AZƏRTAC-a bildirilib ki, qurum 2020-ci ildən BMT-nin Dayanıqlı Fond Birjaları Təşəbbüs Qrupu (UN SSE) və Dünya Birjalar Federasiyası (WFE) ilə əməkdaşlığa başlayıb. Qlobal miqyasda keçirilən “Açılış zəngi” mərasimlərinin məqsədi Dayanıqlı İnkişaf Məqsədlərinə nail olmaq üçün gender bərabərliyinin inkişafında özəl sektorun oynaya biləcəyi əsas rola diqqəti cəlb etmək və Qadınların Səlahiyyətlərinin Artırılması Prinsipləri haqqında məlumatlılığı artırmaqdır.
Qeyd edək ki, hər il BMT-nin Dayanıqlı Fond Birjaları Təşəbbüs Qrupu və Dünya Birjalar Federasiyası mart ayının ilk həftəsində üzvləri olan birjalar ilə birlikdə “Gender Bərabərliyi üçün Açılış zəngi” tədbiri keçirirlər. Bu il dünyada 114 fond birjası tərəfindən “Gender Bərabərliyi üçün Açılış zəngi” tədbiri təşkil olunacaq.
Bölmənin digər xəbərləri
