Gender bərabərliyinin təmin edilməsi Azərbaycanda dövlət siyasətinin prioritet istiqamətlərindən biridir
Bakı, 16 mart, AZƏRTAC
Azərbaycan qadını əsrlərboyu xalqımızın ictimai-siyasi həyatında fəal iştirak edib, öz mərdliyi, saflığı və sədaqəti ilə nüfuz qazanıb, milli-mənəvi dəyərlərimizin formalaşmasında, adət-ənənələrimizin qorunub saxlanılmasında əhəmiyyətli rol oynayıb. Daim öz isməti, ləyaqəti ilə seçilən qadınlarımız bu gün müstəqil Azərbaycanın ictimai-siyasi, sosial-iqtisadi, elmi-mədəni həyatının inkişafına öz töhfələrini verirlər. Biz Birinci vitse-prezident, Heydər Əliyev Fondunun prezidenti Mehriban xanım Əliyevanın timsalında bunun bir daha şahidi oluruq. Onun təşəbbüsü və rəhbərliyi ilə həyata keçirilən tədbirlər, humanizm prinsiplərinə sadiqliyi, ölkənin ictimai-siyasi həyatında fəaliyyəti Azərbaycan qadınları üçün örnəkdir.
Bu fikirləri AZƏRTAC-a Əlillərə və Aztəminatlı Ailələrə İctimai Dəstək Fondunun direktoru Gülbəniz Bayramova deyib.
Direktor bildirib ki, bu gün ölkəmizdə bütün sahələrdə qadınlara böyük etimad göstərilməsi, onlara mühüm vəzifələrin etibar edilməsi gender siyasətinin dövlət siyasətinin əsasını təşkil etməsindən irəli gəlir. Hazırda ölkəmizin bütün rayonlarında icra hakimiyyəti başçılarının müavinlərindən biri qadındır. Hətta rayon icra hakimiyyətinin başçısı olan qadın da var. Fevralın 9-da keçirilən parlament seçkilərində qadın namizədlərin sayının çoxluğu, məntəqə seçki komissiyalarının sədrləri və üzvlərinin böyük hissəsinin qadınlar olması da gender siyasətinin diqqət mərkəzində saxlanılmasının bariz nümunəsidir. Azərbaycanın müstəqillik tarixində ilk dəfə olaraq, Milli Məclis Sədrinin qadın seçilməsi gender siyasətinin daha bir nümunəsidir.
Yeri gəlmişkən, bu il fevralın 9- da keçirilmiş parlament seçkilərində əvvəlki seçkilərlə müqayisədə qadınların təmsil olunmasında 16,8 faiz artımın olması beynəlxalq müşahidəçilərin də diqqətindən yayınmayıb. Seçkiləri izləyən beynəlxalq müşahidəçilər bu faktı xüsusi vurğulayıblar. Altıncı çağırış Milli Məclisə 21 qadının seçilməsi, hətta komitə sədri, onların müavinləri arasında qadınların olması Azərbaycan xanımlarına inam və etimadın göstəricisidir.
Azərbaycanda keçirilən seçkilərdə qadınların fəallığı özünü sonuncu bələdiyyə seçkilərində də büruzə verdi. Bu seçkilərdə uğur qazanmış qadın namizədlərin sayı əvvəlki seçkilərlə müqayisədə xeyli artıb. Müqayisə üçün qeyd edək ki, 2004-cü ildə keçirilən bələdiyyə seçkilərində qadınların iştirakı 4 faiz təşkil edirdisə, 2019-cu il dekabrın 23-də keçirilən seçkilərdə Azərbaycan tarixində ilk dəfə olaraq yüksək faiz dərəcəsi ilə artım müşahidə edildi. Belə ki, bələdiyyə seçkilərində qələbə qazananların 38,81 faizini qadınlar təşkil edib. Bununla da Azərbaycan bələdiyyə seçkilərində qadınların təmsilçilik faizinin yüksək göstəricisinə görə Avropa Şurasına üzv olan beş ölkədən birinə çevrilib.
“Göründüyü kimi, bu gün Azərbaycanda qadınlar cəmiyyət həyatının müxtəlif sahələrində uğurla təmsil olunurlar. Dövlət siyasəti də cəmiyyətdə gender bərabərliyi prinsipinin təmin edilməsinə yönəlib. Həmin prinsiplərin təmin edilməsi ölkənin siyasi, iqtisadi, sosial və mədəni inkişafına təsir göstərən vacib amillərdən biridir. Ölkəmizdə əmin-amanlığın, təhlükəsizliyin təmin olunması biz qadınları daha da ruhlandırır, gələcəyə inamımızı artırır”, - deyə Gülbəniz Bayramova qeyd edib.
Bölmənin digər xəbərləri
