“Gilavar Fotoqrafiya Məktəbi” layihəsinə yekun vurulub VİDEO
Bakı, 1 dekabr, Günel Alıyeva, AZƏRTAC
Bakı Gənclər Mərkəzində “Gilavar Foto Klubu” İctimai Birliyi tərəfindən həyata keçirilən “Gilavar Fotoqrafiya Məktəbi” fotoqrafiya kursu layihəsinin bağlanış mərasimi keçirilib.
AZƏRTAC xəbər verir ki, layihə Elm və Təhsil Nazirliyinin maliyyə dəstəyi ilə “Təhsildə könüllü fəaliyyətin təşkili” qrant müsabiqəsi çərçivəsində təşkil olunub.
“PeşəkarSƏN” maarifləndirmə proqramının tərkib hissəsi olan fotoqrafiya məktəbinin əsas məqsədi foto sənətinə maraq göstərən gənclərin və tələbələrin bu sahədə bilik və bacarıqlarını artırmaq, onların fotoaparatdan düzgün istifadə, kompozisiya qurmaq, işıqla işləmək və professional yanaşma formalaşdırmaq kimi əsas fotoqrafiya vərdişlərini mənimsəməsinə şərait yaratmaqdan ibarətdir. Eyni zamanda layihə, fotoqrafiya sənətinin nəzəri əsaslarının öyrədilməsi, praktiki çəkiliş bacarıqlarının inkişaf etdirilməsi və gənclərin peşəkar foto mühitinə inteqrasiyasının dəstəklənməsini hədəfləyib.
“Gilavar Foto Klubu” İctimai Birliyinin sədri Rəşad Mehdiyev çıxışında bildirib ki, bu gün klubun 8 illik fəaliyyəti qeyd olunur. Klub 2017-ci il dekabrın 1-də yaradılıb: “Məqsədimiz gənc fotoqraflara və bu sahəyə maraq göstərən insanlara fotoqrafiyanın əsas prinsiplərini öyrətmək, fotoqrafiyadan düzgün istifadə vərdişlərini formalaşdırmaq və onları peşəkar fotoqraf kimi yetişdirməkdir”.
“Gilavar Foto Klubu” İctimai Birliyinin sədr müavini, layihə rəhbəri, tanınmış fotoqraf Dilavər Nəcəfovun sözlərinə görə, layihəyə start verilən zaman 150-yə yaxın müraciət daxil olub, seçim mərhələsindən sonra 50 tələbə kursa cəlb edilib. Onların arasından 33 nəfər təlim proqramını tam başa vuraraq sertifikatlarla təltif olunub. Ödənişsiz təşkil olunan təlim kursunda əsasən fotoqrafiyaya maraq göstərən və sosial durumu aşağı olan 16-30 yaş aralığında gənclərə, peşə və ali məktəblərdə təhsil alan tələbələrə üstünlük verilib.
Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdir müavini Ayla Həsənova-Məmmədova belə layihələrin uşaqların və gənclərin yaradıcılıq potensialının üzə çıxarılması, onların hərtərəfli inkişafı və ölkəmizin gələcək intellektual-mədəni mühitinin formalaşmasında xüsusi əhəmiyyətə malik olduğunu vurğulayıb. O, həmçinin qeyd edib ki, Elm və Təhsil Nazirliyi məhz bu məqsədlə yaradıcı uşaqları və gəncləri bir araya gətirən müxtəlif layihə, proqram və müsabiqələr həyata keçirir və bu təşəbbüslər davamlı xarakter daşıyır.
Təlimlər ölkənin peşəkar fotoqrafları Rauf Umudov və Tofiq Babayev tərəfindən öncədən hazırlanmış proqram əsasında və tədris sisteminə uyğun həyata keçirilib.
Kurs müddətində iştirakçılara fotoqrafiyanın sirləri, kompozisiya və işıqlandırma, müxtəlif foto janrları, çəkiliş metodları, texniki parametrlər və kamera ilə işləmə qaydaları əhatəli şəkildə izah edilib. Bununla yanaşı, tələbələr üçün real çəkiliş prosesi üzərində qurulan praktiki dərslər, eləcə də peşəkar fotoqraflarla ustad dərsləri təşkil olunub. Təlim prosesinin mühüm mərhələlərindən biri də foto emalı üzrə dərslər olub. İştirakçılar fotoredaktor proqramlarında rəng korreksiyası, retuş, kadr seçimi, kompozisiya düzəlişləri və peşəkar postproses işinin əsaslarını öyrəniblər.
Layihə çərçivəsində gənclərin inkişafı məqsədilə beynəlxalq platformalarla əməkdaşlıq imkanları yaradılıb. Kursun bir çox tələbəsi müxtəlif beynəlxalq fotomüsabiqələrdə iştirak edərək yüksək nəticələr göstərib, mükafatlar və sertifikatlar əldə ediblər.
Sonda beşaylıq fotoqrafiya kursunu uğurla başa vuran məzunlara “Gilavar Foto Klubu” İctimai Birliyi tərəfindən sertifikatlar təqdim olunub.
Qeyd edək ki, tədbir çərçivəsində kurs iştirakçılarının çəkdiyi fotolardan ibarət sərgi də açılıb.
Bölmənin digər xəbərləri
