GİMNASTİKA FEDERASİYASI İLİN YEKUNLARINI UĞURLU HESAB EDİR
2003-cü ilin aprelində FİG-in prezidenti Bruno Qrandi başda olmaqla bu təşkilatın nümayəndə heyəti Bakıya gəlmişdir. Onun Azərbaycan Milli Olimpiya Komitəsinin prezidenti İlham Əliyev ilə görüşündə bədii gimnastika üzrə dünya çempionatını 2005-ci ilin oktyabrında Bakıda keçirmək barədə razılıq əldə edilmişdir.
Azərbaycandakı idman obyektləri, ölkəmizdə idmanın sürətli inkişafı FİG rəhbərliyini heyrətləndirmişdir. Bunun nəticəsi olaraq, bədii gimnastika üzrə Dünya Kubokunun ikinci mərhələsinin yarışları 2003-cü ilin avqustunda Bakıda yüksək səviyyədə keçirilmişdir. Gimnastımız Dinara Gimatova yarışlarda uğurla çıxış edərək, bir gümüş və iki bürünc medal almış, Azərbaycan komandası 17 iştirakçı ölkə arasında 2-ci olmuşdur. Qarşıda duran əsas vəzifə isə 2004-cü ilin Olimpiya oyunlarına lisenziya qazanmaq idi. Dinara Gimatova sentyabr ayında Macarıstanın paytaxtı Budapeştdə keçirilmiş çoxnövçülük üzrə dünya çempionatında 8-ci yer tutaraq, Olimpiya oyunlarına lisenziya əldə etmişdir.
UEG-in oktyabrda Vyanada keçirilmiş konqresində AGF-nin vitse-prezidenti Altay Həsənov və baş katibi Çingiz Şamilovdan ibarət nümayəndə heyəti gimnastika avadanlığı satan “Şpit” və “Yansen-Fritsen” şirkətlərinin rəhbərləri ilə danışıqlar aparmışdır. Ölkəmizdə gimnastika kompleksi də tikiləcəkdir.
Gimnast qızlarımız təlim-məşq toplantısını Rusiya Bədii Gimnastika Federasiyasının razılığı ilə Moskvada, Olimpiya Hazırlığı Mərkəzində keçirmiş, Azərbaycan yığma komandasının baş məşqçisi Valentina Ukleina isə növbəti, III breve hakimlik dərəcəsini almışdır. Bu, V.Ukleinaya bütün beynəlxalq yarışlara hakimlik etmək hüququ verir.
2004-cü ilə gəldikdə isə, apreldə keçiriləcək Dünya Kubokundan əlavə, respublikanın idman təqviminə yeni turnir – Federasiya Kuboku da daxil edilmişdir.
Ötən il idman gimnastikasında da xeyli irəliləyiş nəzərə çarpmışdır. Federasiya ölkəmizdə bu idman növünun inkişafına dair konkret vəzifələr irəli sürmüşdür. Məqsəd isə 2008-ci ilin Olimpiya oyunlarında iştirak etməkdır. Milli çempionatımız da xeyli canlanmışdır. Gimnastlarımız, FİG-in tələb etdiyi kimi mürəkkəb təmrinləri yerinə yetirməyə başlamışlar. 2004-cü ilin yanvarından yenilik tətbiq ediləcəkdir. Bədən Tərbiyəsi və İdman Akademiyasının son kurslarında təhsil alan gənc məşqçilər gimnast qızlarla işə cəlb olunacaqlar. Azərbaycan gimnastları İran və Türkiyədə keçirilən iki beynəlxalq turnirdə iştirak etmişlər. Gimnastlarımız fevral ayında İranda turnirdə, ilin sonunda isə İstanbulda Bosfor Kubokunda iştirak edəcəklər.
İdman akrobatlarımız da ili yaxşı nəticələrlə başa vururlar. Onlar Moskvada, Vinnitsada, Odessada və Oryolda keçirilmiş beynəlxalq turnirlərdən medallarla qayıtmışlar. Elşən Seyfullayev, Nemət Ağayev, Elnur Məmmədov və Rəşad Sadıqovdan ibarət kişi gimnast qrupumuz Polşada Avropa çempionatında 4-cü yeri tutmuşdur. Yanvar ayından etibarən komandanın bütün beş qrupunun testdən keçirilməsinə və Belçikada beynəlxalq turnirə, Fransada dünya çempionatına hazırlığa başlanacaqdır.
Bu il ölkəmizdə idmanın yeni növü olan tramplin-tamblinqlə məşğul olanların sayı xeyli artmışdır. Odessada keçirilmiş beynəlxalq turnirdə idmançımız Abdulla Qasımov mükafata layiq yer tutmuşdur. Gələn il bu növlə məşğul olan idmançılarımızın beynəlxalq turnirlərə və Bolqarıstanda Avropa çempionatına qatılacağı gözlənilir. Getdikcə daha çox gənc tramplin-tamblinqlə məşğul olur, ölkədaxili yarışlar isə idmanın bu növünə marağın artdığını göstərir.
Bölmənin digər xəbərləri
