GÖMRÜK KOMİTƏSİNDƏ İŞƏ YENİ QƏBUL OLUNAN GƏNC MÜTƏXƏSSİSLƏRLƏ GÖRÜŞ KEÇİRİLMİŞDİR
Yeni vəzifə təyinatı münasibətilə gənc mütəxəssisləri təbrik edən DGK sədri K.Heydərov, müstəqil Azərbaycanın gömrük sistemində ilk dəfə olaraq sırf gömrük ixtisasını bitirən gənclərin işə qəbul edilməsini əlamətdar hadisə kimi səciyyələndirərək, onlara iqtisadi təhlükəsizliyimizin keşiyində ayıq-sayıq dayanmağı, içəcəkləri gömrük andına sadiq qalaraq milli mənafelərimizin qorunmasında müvəffəqiyyətlər arzulamışdır.
Azərbaycan gömrük sisteminin keçdiyi inkişaf yolundan danışan komitə sədri demişdir ki, artıq respublikamızın gömrük təşkilatı beynəlxalq gömrük ailəsində oynadığı fəal rola görə seçilir, ölkənin iqtisadi maraqları layiqincə qorunur, gömrük orqanlarında yetişən sağlam gömrükçü nəsli dövlət quruculuğu prosesində fəal iştirak edir.
Komitə sədri işə yeni qəbul olunan gənclərin nəzərinə onu da çatdırmışdır ki, bu gün müstəqil Azərbaycan dövləti bütün sahələrdə böyük nailiyyətlər qazanaraq dünya birliyinə uğurla inteqrasiya olunur. Bu uğurlar, ilk növbədə, Azərbaycan Prezidenti Heydər Əliyevin adı və fəaliyyəti ilə bağlıdır. Bütün mənalı ömrünü Azərbaycan dövlətinin və xalqının yüksəlişinə həsr edən, dövlətçiliyin möhkəmləndirilməsinə, milli ideologiyanın formalaşmasına böyük önəm verən Heydər Əliyev gənclərimizə də diqqət və qayğısını əsirgəməmişdir. Cəmiyyətin bütün sahələrində, o cümlədən idman sahəsində baş verən əsaslı dəyişikliklər məhz uzaqgörən siyasətin nəticəsidir. İndi idmanın nəinki sadəcə fiziki sağlamlıq, istirahət vasitəsi, həm də beynəlxalq münasibətlərin inkişafında mühüm amillərdən biri kimi böyük əhəmiyyətə malik olduğunu vurğulayan K.Heydərov Azərbaycan idmanının inkişafında Milli Olimpiya Komitəsinin prezidenti İlham Əliyevin əvəzsiz xidmətlərindən danışmışdır.
DGK sədri K.Heydərov son günlərin ağrılı bir məsələsinə də diqqəti yönəldərək qeyd etmişdir ki, dağıdıcı müxalifət və onun himayə etdiyi qəzetlər möhtərəm Prezidentimiz Heydər Əliyevin səhhəti ilə bağlı böhtan xarakterli şayiələr yayır, heç bir əxlaqa, mənəviyyata sığmayan vasitələrlə qarşıdan gələn prezident seçkilərinin demokratik keçiriləcəyini şübhə altına almağa cəhd göstərir. Müxalifətin dövlətimizin başçısına böhtan atması bir vətəndaş kimi hər bir gömrük əməkdaşının da sonsuz hiddət və qəzəbinə səbəb olmuşdur. Ölkəmizdə yaradılan sabitliyi pozmağa cəhd göstərən bu cür qüvvələr bilməlidirlər ki, Azərbaycan xalqı artıq öz seçimini edib. Hər bir gömrükçü möhtərəm Prezidentimizlə bir sıradadır və bir vətəndaş olaraq müxalifətin apardığı iyrənc kampaniyanı nifrətlə pisləyir. Komitə sədri işə yeni qəbul olunan gənc gömrükçülərə müstəqilliyimizin keşiyində ayıq-sayıq dayanmağı tövsiyə etmişdir.
İşə yeni qəbul olunan mütəxəssislər adından çıxış edən Rəşad İsmayılov komitə sədrini əmin etmişdir ki, onlar göstərilən etimadı əməli işlə doğruldacaq, çalışdıqları sahədə şərəfli gömrükçü peşəsinin sirlərinə mükəmməl yiyələnəcək və Heydər Əliyev məktəbinin layiqli davamçıları olacaqlar.
Bölmənin digər xəbərləri
