Gömrük orqanlarına xidmətə yeni qəbul olunan əməkdaşların andiçmə mərasimi keçirilib
Bakı, 8 may, AZƏRTAC
Bu gün Ümummilli Lideri Heydər Əliyevin anadan olmasının 103-cü ildönümü tədbirləri çərçivəsində Dövlət Gömrük Komitəsinin Akademiyasında gömrük orqanlarına xidmətə yeni qəbul olunmuş əməkdaşların andiçmə mərasimi keçirilib.
AZƏRTAC xəbər verir ki, tədbir Dövlət Himninin səsləndirilməsi ilə başlayıb, sonra Ümummilli Lider Heydər Əliyevin və respublikamızın ərazi bütövlüyü uğrunda canlarını fəda etmiş Vətən övladlarının xatirəsi bir dəqiqəlik sükutla yad edilib.
Ümummilli Liderin həyat və fəaliyyəti, eləcə də gömrük orqanlarına tövsiyələrini əks etdirən videoçarxların nümayişindən sonra xidmətə yeni qəbul edilən 84 əməkdaş Gömrükçü Andı içib və hərbi marşın sədaları altında təntənəli şəkildə tribuna önündən keçiblər.
Dövlət Gömrük Komitəsinin sədri Şahin Bağırov mərasimdə çıxış edərək vurğulayıb ki, gömrükçülər Heydər Əliyev siyasətinə, dövlətçiliyimizə sadiq olduqlarını sübut etməklə, Azərbaycanın iqtisadi təhlükəsizliyini qorumaq üçün and içirlər.
Komitə sədri bildirib ki, dövlət tərəfindən gömrük xidmətinin daha effektiv fəaliyyəti üçün bütün zəruri imkanlar yaradılır. Onun sözlərinə görə, qaçaqmalçılığa qarşı mübarizə sahəsində müasir texnoloji vasitələrdən istifadə, nəzarət mexanizmlərinin təkmilləşdirilməsi və operativ fəaliyyət imkanlarının genişləndirilməsi əsas prioritetlərdəndir.
Ş.Bağırov qeyd edib ki, gömrük orqanlarının əsas vəzifələrindən biri də ticarətin asanlaşdırılması və sahibkarlıq subyektlərinə dəstəyin göstərilməsidir. “Biz ticarətin asanlaşdırılması vasitəsilə ölkədə investisiya mühitinin genişlənməsinə, ixrac potensialının artmasına və iqtisadi inkişafın sürətlənməsinə xidmət edirik. Məqsədimiz sahibkarlar üçün daha şəffaf, operativ və əlverişli gömrük mühiti formalaşdırmaqdır”, – deyə Komitə sədri vurğulayıb.
Bildirilib ki, müasir dövrdə rəqəmsallaşma və innovativ idarəetmə sistemlərinin tətbiqi gömrük xidmətinin fəaliyyətində xüsusi əhəmiyyət daşıyır. Bu baxımdan elektron xidmətlərin genişləndirilməsi, süni intellekt əsaslı nəzarət mexanizmlərinin tətbiqi və beynəlxalq təcrübənin öyrənilməsi istiqamətində işlər davam etdirilir.
Ş.Bağırov çıxışında Ulu Öndər Heydər Əliyev tərəfindən müəyyən edilmiş dövlətçilik prinsiplərinin gömrük orqanlarının fəaliyyətində mühüm yer tutduğunu qeyd edib. O bildirib ki, milli maraqlara əsaslanan idarəçilik modeli bu gün də uğurla davam etdirilir.
Komitə sədri, həmçinin Azərbaycan Prezidenti İlham Əliyev tərəfindən həyata keçirilən qətiyyətli siyasətin Azərbaycanın hərtərəfli inkişafına mühüm töhfə verdiyini vurğulayıb. Onun sözlərinə görə, ölkənin iqtisadi gücünün artması, işğaldan azad olunmuş ərazilərdə genişmiqyaslı quruculuq işlərinin aparılması və beynəlxalq nüfuzunun yüksəlməsi həyata keçirilən uğurlu dövlət siyasətinin nəticəsidir.
Qeyd edilib ki, gömrük sistemində əldə edilən böyük uğurlar məhz Ulu Öndərin bu sahəyə diqqət və qayğısı nəticəsində mümkün olub.
Bildirilib ki, bu gün Heydər Əliyevin ideyaları böyük uğurla davam etdirilir, Prezident İlham Əliyevin rəhbərliyi ilə ərazi bütövlüyünü tam bərpa edən Azərbaycan sürətlə inkişaf edir və gömrük orqanları da daim ölkəmizin tərəqqisinə öz töhfəsini verəcək.
Daha sonra digər çıxış edənlər Ümummilli Lider Heydər Əliyevin xalqımız qarşısında əvəzsiz xidmətlərindən danışıb, onun əziz xatirəsinin daim yaşadılacağını bildiriblər.
Tədbirin sonunda Dövlət Gömrük Komitəsinin Akademiyasının tələbələrinin iştirakı ilə xüsusi kompozisiya nümayiş etdirilib.
Bölmənin digər xəbərləri
