Ulu Öndər öz xilaskarlıq missiyası ilə Azərbaycanı məhv olmaqdan, parçalanmaqdan xilas edib
Bakı, 8 may, AZƏRTAC
Bakının Qaradağ rayonu, Neftçi Qurban adına 288 nömrəli tam orta məktəbdə Ümummilli Lider Heydər Əliyevin anadan olmasının 103-cü ildönümünə həsr olunmuş “Müstəqil Azərbaycanın memarı” adlı tədbir keçirilib. Tədbir Ulu Öndərin zəngin irsinin gənc nəslə aşılanması məqsədilə təşkil olunub.
AZƏRTAC xəbər verir ki, Dövlət Himninin səsləndirilməsi ilə başlayan tədbirdə Ümummilli Lider Heydər Əliyevin, ölkəmizin müstəqilliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad olunub.
Məktəbin direktoru Aygün Hüseynova Ulu Öndər Heydər Əliyevin Azərbaycan dövlətçiliyinin möhkəmləndirilməsi və milli-mənəvi dəyərlərin qorunması istiqamətindəki misilsiz xidmətlərindən bəhs edib. Direktor vurğulayıb ki, 1993-cü ildə xalqın təkidli tələbi ilə hakimiyyətə qayıdan Ulu Öndər öz xilaskarlıq missiyası ilə Azərbaycanı məhv olmaqdan və parçalanmaqdan xilas edərək, ölkəmizi xaosdan davamlı tərəqqi relsləri üzərinə çıxarıb. O qeyd edib ki, məhz Dahi Liderin praqmatik xarici siyasət kursu sayəsində Azərbaycan qısa müddətdə beynəlxalq birliyin nüfuzlu və bərabərhüquqlu üzvünə çevrilib.
A.Hüseynova, həmçinin Ümummilli Liderin təhsil sahəsində apardığı strateji islahatlara toxunaraq bildirib ki, “Təhsil millətin gələcəyidir” fəlsəfəsini rəhbər tutan Ulu Öndər Heydər Əliyev hələ ötən əsrin 70-ci illərindən başlayaraq Azərbaycanın gələcəyi üçün milli kadr potensialının hazırlanmasının möhkəm bünövrəsini qoyub. Direktor dahi şəxsiyyətin müəyyən etdiyi inkişaf strategiyasının bu gün də ölkəmizin tərəqqisinin təməl daşını təşkil etdiyini diqqətə çatdırıb. O, gənc nəslin vətənpərvər ruhda yetişməsində, onlarda azərbaycançılıq ideologiyasının formalaşmasında bu qəbildən olan maarifləndirici tədbirlərin müstəsna əhəmiyyət kəsb etdiyini vurğulayıb.
Direktor həmçinin qeyd edib ki, bu gün Dahi rəhbərin müdrik siyasi kursunun layiqli davamçısı Prezident İlham Əliyev tərəfindən təhsil sahəsində həyata keçirilən genişmiqyaslı islahatlar, müasir məktəb infrastrukturunun qurulması və insan kapitalının inkişafına yönəlmiş dövlət proqramları Ulu Öndərin maarifçilik ideallarının təntənəsidir.
Məktəbin 3d sinfinin rəhbəri Ülviyyə Əliyeva çıxışında Ulu Öndərin ömür yolunun və siyasi fəaliyyətinin hər bir gənc üçün örnək olduğunu qeyd edərək tədbirin əhəmiyyətindən danışıb.
Tədbir 3d sinfinin şagirdləri tərəfindən hazırlanmış bədii proqramla davam etdirilib. Məktəblilər Ümummilli Liderə həsr olunmuş şeirlər səsləndirib, vətənpərvərlik ruhunda səhnəciklər və ədəbi-bədii kompozisiyalar nümayiş etdiriblər.
Bölmənin digər xəbərləri
