Qazaxıstanda vətəndaşların seçkilərdə məcburi iştirakını tətbiq etmək nəzərdə tutulmur
Astana, 8 may, AZƏRTAC
Qazaxıstan vətəndaşların seçkilərdə və referendumlarda məcburi iştirakını tətbiq etməyi düşünmür.
AZƏRTAC “Kazinform” agentliyinə istinadla xəbər verir ki, bu barədə jurnalistlərə Qazaxıstan Mərkəzi Seçki Komissiyasının katibi Şavkat Utemisov bildirib.
O, “Seçkilər haqqında” Konstitusiya Qanununa düzəliş layihəsində qazaxıstanlıların səsvermədə məcburi iştirakı üçün müddəaların olmadığını və MSK-nın bu cür dəyişikliklər etməyi planlaşdırmadığını bildirib. Utemisov, həmçinin Qazaxıstanda, xüsusən də gənclər arasında seçki fəallığının azalması problemini etiraf edib.
Onun sözlərinə görə, bir sıra Qərb ölkələri seçici fəallığını təşviq etmək üçün müxtəlif tədbirlər həyata keçirir. Məsələn, Belçikada səsvermə yaşını 16-ya endirmək, seçkilərə gəlməməyə görə cərimələr tətbiq olunur. Lakin Qazaxıstan hazırda bu yolu tutmur. Səsvermə yaşının 18-dən 16-ya endirilməsi də nəzərdən keçirilmir.
MSK katibi vurğulayıb ki, seçkilərdə iştirak siyasi partiyalar da daxil olmaqla, seçki prosesi iştirakçılarının özlərinin fəaliyyətindən asılıdır. Bu, xüsusən də qarşıdan gələn Kurultay (parlament) seçkiləri kontekstində aktualdır. Seçki fəallığını artırmaq üçün təşviqlərin tətbiqi ehtimalını şərh edən MSK katibi bu cür təşəbbüslərin seçicilərin pulla ələ alınması kimi qəbul edilə biləcəyini qeyd edib.
Bölmənin digər xəbərləri
