Bakı, 26 may, AZƏRTAC

Dövlət Gömrük Komitəsinin bir qrup əməkdaşı Azərbaycan Xalq Cümhuriyyətinin yaranmasının 100-cü ildönümü münasibətilə Milli Azərbaycan Tarixi Muzeyini ziyarət edib.

Dövlət Gömrük Komitəsinin mətbuat xidmətindən AZƏRTAC-a bildirilib ki, gömrük əməkdaşlarına muzeydə tariximiz, o cümlədən Azərbaycan Xalq Cümhuriyyəti ilə bağlı nadir eksponatların qorunub saxlanılması və geniş elmi araşdırmalar barədə məlumat verilib.

Bildirilib ki, Cümhuriyyət tarixinin tədqiq olunması, öyrənilməsi və təbliğ edilməsi olduqca aktual və önəmli məsələdir. Muzeydə dövlətçilik tariximizdə müstəsna yeri olan Azərbaycan Xalq Cümhuriyyəti dövrünə aid materialların toplanması yalnız Azərbaycanın müstəqilliyinin bərpasından sonra mümkün olub.

Qeyd edilib ki, ümummilli lider Heydər Əliyev Azərbaycan Xalq Cümhuriyyətinin tarixinə, ölkəmizlə bağlı həqiqətlərin üzə çıxarılmasına və dünyaya çatdırılmasına hər zaman böyük diqqət yetirib. Prezident İlham Əliyevin Sərəncamı ilə 2018-ci ilin ölkəmizdə “Azərbaycan Xalq Cümhuriyyəti İli” elan edilməsi xalqımızın həyatında mühüm hadisədir. Bu, Şərqdə ilk parlamentli respublika olan Azərbaycan Xalq Cümhuriyyətinə verilən tarixi qiymətdir.

2006-2008-ci illərdə Milli Azərbaycan Tarixi Muzeyində əsaslı təmir-bərpa işləri aparılan zaman muzeydə Azərbaycan Demokratik Respublikasına aid onlarla nadir material aşkar edilib, onların tarixi müəyyənləşdirilib. İlk dəfə 2007-ci ildə muzeyin daimi ekspozisiyasında “Azərbaycan Cümhuriyyəti” adlı bölmə açılıb. Cümhuriyyətin 100 illiyi ilə əlaqədar hazırda muzeydə müxtəlif mövzularda tədbirlər keçirilir. Bu tədbirlərdən biri “Azərbaycan Cümhuriyyətinin dahi şəxsiyyətləri” sərgisinin təşkilidir.

Gömrük əməkdaşlarına cəmi 23 ay yaşamış Azərbaycan Xalq Cümhuriyyətinin xalqımızın dövlətçilik və ictimai-siyasi fikir tarixində rolundan bəhs edilib. Vurğulanıb ki, Cümhuriyyət tariximiz Azərbaycan xalqının hər zaman müstəqil yaşamağa, öz dövlətçilik ənənələrini bərpa etməyə qadir olduğunu sübut edir.